Кеше елордадағы «Қазақстан» концерт залында елімізде бесінші жыл қатарынан ұйымдастырылып келе жатқан «Қазақ аруы-2015» республикалық сұлулық байқауы өтті.
Еліміздің ең әдемі аруы атағы үшін 16 мен 25 жас аралығындағы 26 үміткер сынға түсті. Бұл сайыста тек ең сұлулар ғана іріктелген жоқ, сонымен бірге талантты, ең бастысы, өз халқының салт-дәстүр, әдет-ғұрпын, тарихы мен мәдениетін жақсы білетін жас қыздар таңдалды.
Байқау бірнеше кезеңнен тұрды. Айта кетсек, қазақстандық дизайнерлердің қолынан шыққан киімдердің сән байқауы, шығармашылық және зияткерлік әлеуеттері сын тезінен өтті. Сонымен қатар, қатысушылар өздерінің шығармашылық қабілеттерін көрсетті. Әсерлі сәнді би билеп, еліміздің эстрада жұлдыздарымен бірге дуэтте өнер көрсетті.
Биылғы байқауда қыздардың қазақстандық дизайнерлердің киімдерін киіп шығатын жыл сайынғы дефилесінде қатысушылар Аида Қауменова, Наиль Байкучуков пен Jaka Fashion сән үйі тіккен көйлектерде шықты.
Байқаудың нәтижесі бойынша бас жүлде және «Қазақ аруы-2015» атағы Қарағанды облысының тумасы Кәмшат Қоскеловаға бұйырды. Оған ару тәжін өткен жылғы байқау жеңімпазы Гүлназ Жоланова салтанатты түрде табыс етті.
Біз де Кәмшатты жеңісімен құттықтаймыз!
