Ресей сахнасын бағындырған қазақ әншілері кімдер?

Күні кеше ғана еліміздің талантты әншісі Димаш Құдайберген Ресейде өнер көрсетіп, теріскейдегі көрші елдің жүрегін жаулап алған еді. Айта кетерлігі, Ресей эстрадасының жарық жұлдызына айналып, Қазақстанның атын шығарған өнер иелері жетіп артылады. Осыған орай NUR.KZ назарларыңызға Ресей эстрадасының жарық жұлдызына айналған қазақ әншілерінің тізімін ұсынады.

Кеңес одағы тұсында атағы жер жарған "На-на" тобының негізін қалаушылардың бірі – Бари Алибасовтың Шығыс Қазақстан облысы, Шар бекетінде дүниеге келгенін бірі білсе, енді бірі біле бермейді. Танымал топ жетекшісі бүгінде Ресейде тұрады. Десе де Бари Алибасов жерлестеріне жиі келіп, түрлі концерттер беріп тұрады.

Ресей эстрадасын бағындырған қазақ әншілерінің бірегейі Батырхан Шүкенов. Ресейлік өнер жұлдыздары "Батыр аға" жайлы жылы естеліктерімен күні бүгінге дейін бөліседі. Ал өзі кезінде ән айтқан "А студио" тобы болса бүгінгі күнге дейін Ресей эстрадасының жарық жұлдыздары болып саналады.

"А студио" тобының тағы бір мүшесі – Байғали Серкебаев та Ресей елінде кеңінен танымал. Атақты опера әншісі Ермек Серкебаевтың ұлы бүгінде Ресейде тұратынымен, Қазақстанға жиі келіп тұрады. Музыкант әсіресе Алматы және Астана қалаларында жиі концерт ұйымдастырады.

Бурят елінде туса да, 6 жасында Шығыс Қазақстанның Өскемен қаласына келіп, сонда мектеп бітірген тағы бір әнші – Сергей Зверев. Танымал стилист өз сұхбаттарында талай рет Өскеменде өткен балалық шағы туралы айтып берген еді.

Ресей сахнасын бағындырған аға буын өкілдерінің ізін – Назима, Скриптонит сынды қазақтың ұл-қыздары жалғастырды. Шымкенттік Назима әйгілі Тиматидің "Black Star" продюсерлік компаниясында өнер көрсетсе, Скриптонит өзінің рэп әндерімен Ресей елінің сүйікті әншісіне айналды.

Өзінің ерекше өнерімен ресейлік тыңдармандарды баурап алған тағы бір өнер иесі – Димаш Құдайберген. Әнші танымал композитор Игорь Крутоймен ән орындап, келер жылы Мәскеуде өзінің ән кешін ұйымдастыруды жоспарлап отыр.