Отандық танымал әнші Әлішер Кәрімов небәрі 40 күнде он екі келі артық салмақ тастаған. Шоу-бизнес жұлдызы бір айдан астам уақыт ішінде өзі жеткен жетістігін қайталау үшін не істеу керектігін айтып берді. Өнер иесі қандай тамақ түрінен бас тартқанын KAZ.NUR.KZ материалынан біле аласыздар.
Фото: Instagram/alisher_k. Коллаж: KAZ.NUR.KZ
Кәрімов 40 күн ішінде айтарлықтай салмақ тастау үшін тамақтану тәртібін түбегейлі өзгертіп тастаған.
Енді әнші үшін картоп, күріш, нан, қойдың еті секілді азық-түлік мүлдем жоқ болып есептелінеді.
Эстрада жұлдызы арықтау үрдісін өзінің Instagram парақшасында егжейлі-тегжейлі айтып берген.
"Мен 40 күнде 12 келіні еңсердім. Сол кезде менің салмағым 100 келі болатын. Бойым ұзын болса да, мен артық салмақты сезінетінмін. Бұл проблемадан құтылу үшін біріншіден, мен өзімнің тамақтану тәртібімді өзгертіп тастадым.
Себебі, біздің денеміз бен бет-әлпетіміз біздің жейтін тамаққа тікелей байланысты. Сол сәттен бері мен картоп, нан, күріш, тәттілер мен қойдың етін жемеймін.
Картоптан бас тарту үшін маған бес жыл уақыт кетті. Қазір мен үшін картоп деген көкөніс жоқ. Нанды өте сирек жеймін. Кейде иісі аңқып тұрғанда өзімді ұстай алмай кететінім бар.
Тәттіден әлі толығымен бас тартқан жоқпын. Әзірге қолымнан келмей жатыр. Бірақ, мен тырысып жүрмін. Қой еті - мен үшін аса ауыр" , - деді ол.
Оған қоса, әнші қазіргі күні қалай тамақтанып жүргенін айтып берді.
"Мен өте көп су ішемін және теңіз азық-түлігін көп жейтін болдым. Еттен жылқының етін таңдаймын. Ол екі-ақ сағатта қорытылып кетеді. Осы ұстанымдарымның арқасында мен қазір 35 жастағыдай болып көрініп жүрмін" , - деп бөлісті өнер иесі.
Айта кетейік, бұған дейін пластикалық ота жасатқан Әлішер Кәрімовты өнердегі әріптестері сынағанын жазған болатынбыз.