Ғашық жүрек сериалын тамашалар күн жақын

Алматыдағы «Спут­ник» кинотеатрында «Ға­шық жүрек» атты жаңа телетоптаманың бірінші сериясының көрсетілімі болып өтті. Бұл телехикая көпшілікке белгілі «Ғашық жүрек» және «Ғашық жүрек-2» фильмдерінің желісі бойынша түсірілген. Аталмыш екі картина 2010-2011 жылдардың нәтижесі бойынша ең табысты фильм болып есептеледі. Сол тұста кинопрокатта қос фильм рекорд жасаған. «Енді соңғы түсірілген «Ғашық жүрек» те көп­ші­лік көрермендердің көңілінен шығып, ыстық ықы­ласына бөленеді деп ойлаймыз», – дейді жобаны жасаушылар.
Телехикаяда балалар үйінде тәр­бие­ленген кішкентай талантты қыздың өмірі суреттеледі. Жоғарыда айтылған қос фильмді көрген дарынды қыз балалар үйінің тәрбиеленушісі бола тұра, үлкен сах­наға шығуға болатынын түсінеді. Кіш­кентайынан өмірдің көлеңке тұстарын көп көрген жетім балдырған үшін нағыз күрес басталады. Ол табиғатында талантты екенін жақсы біледі. Сондықтан да кинодағы кейіпкердің тағдырын қай­талағысы келеді. Бұл қарапайым сериал емес, бұл – әлеуметтік жүгі бар, айтар ойы­мен қоғамға қозғау салатын бағыты бар сериал.
Сонымен қатар, телехикаяда белгілі теле­жүргізуші Баян Есентаеваның өмір­баяндық желісі қарастырылған. Оның продюсерлікке қалай келгені, сахнаның сыр­тындағы өмірде болатын сатқындық пен алауыздық, әділдік пен әділетсіздік жайын­да көрерменге шынайы мәлі­меттер беріледі.
Басты кейіпкерлермен қатар, қан­шама адамның тағдыры, бірнеше кезең­нің бет бейнесі суреттеледі. Тағы бір айта кететін жайт, бұл телехикаяда кейіп­кер­лердің кішкентай кезінен бастап, ересек шағына дейін көрсетіледі. Демек, актер­лердің сырт келбетіндегі ұқсастық, ішкі үйлесімділік мәселесі басты назарда бол­ған. Телесериал әдемі әуенге бай. Халық әндерінен бастап, 80-90-жыл­дар­дың хит әндері, сонымен қатар, осы сериалға арнайы жазылған музы­ка­лық шығармалар қолданылады.
«Ғашық жүректің» алғашқы көрсе­ті­лі­мінде шығармашылық топ көрер­мен­дермен бұл жобаның ерекшеліктерімен, ал актерлер өз пікірлерімен бөлісті.
–Біз тек қана сапалы өнімді ұсынып отырған жоқпыз, біздің ең басты мақсат – жетімдер үйіндегі балалар, олардың ауыр тағдыры мен шыңдалған мінездерін көрсетіп, жұртшылықтың назарын осы бір өзекті мәселеге аударғымыз келді,– дей­ді «Ел арна» телеарнасының ди­рек­то­ры Айгүл МҮКЕЙ.
Шығармашылық топ жетім қыздың оқиғасын негізге ала отырып, әлеуметтік мәсе­лелерді көтеріп, кейбір тәрбие­ші­лердің зорлық-зомбылықтары, жалпы, өмірдің қуанышы мен қайғысын, суығы мен ыстығын көрсетумен ерекшеленеді. Телехикая мазмұны, сюжеті – қазақтікі, фильм қазақ тілінде. Алайда ара-ара­сында орысша диалогтерді де кез­дес­тіруге болады.
Баян ЕСЕНТАЕВА, «Ғашық жүрек» фильмінің продюсері:
–Топтаманың түсірілімі біз үшін қарым-қатынас мектебі болды. Біз балалар үйінде тұрдық, олармен бірге түні бойы ұйықтамай, олар қуанса – қуандық, қиналса – қинал­дық. Қалай десек те, біз сапалы топ­та­маны түсіруге болатынын дәлел­дедік. Бұл фильм – музыкалық жоба. Топтаманың ресми саунд­тре­гі­нің өзі кез келген адамды елжіретпей қоймайды. Халық әндері, өлеңдер, авторлық туындылар – жүректі әлі бірне­ше рет сыздатады.
Әсел ІЗБАСАРОВА, «Дара» қайы­рым­дылық қорының президенті:
–Бұл топтама біз күнделікті жұмыс істейтін балалар жайында болып отыр. Өкінішке қарай, балалар үйінің тәрбиеленушілері мектеп-интер­натынан тыс өмірге бейімделмеген. Сон­дықтан біздің қоғам оларға әрдайым көмектесіп, қолдау көрсетуі керек.
Бізде отандық телесериалдар жоқ емес, бар. Алайда олардың барлығы дер­лік корейдің не түріктің сериалдары секілді көпшілікті жаппай баурап алады деп айта алмаймыз. Енді шетелдің сериалдарынан жалыққан көпшілік көрер­меннің назары өзіміздің «Ғашық жүрек» атты телетуындымызға жаппай ауады деген сенім бар.
Айта кетейік, енді бұл топтама «Ел арна» телеарнасынан 15 қазаннан бас­тап дүйсенбі мен бейсенбі аралығында көр­сетілетін болады.