Түркістан облысында мектептерге 71 жаңа автобус берілді
Түркістан облысының мектептеріне 71 жаңа автобус тапсырылды.
"Наурыз мерекесін атап өту жөніндегі онкүндік аясында Түркістан облысында ауыл мектептеріне арнайы 71 автобус беріліп отыр. Облыс әкімі Дархан Сатыбалды жаңа автобустардың кілтін тапсырып, көпшілікті қуанышты сәтпен құттықтады", - деп хабарлады өңір әкімінің баспасөз қызметі.
Ведомствоның мәліметінше, жуырда ғана өңірде 1 мыңыншы мектеп ашылды. "Жайлы мектеп" жобасы аясында 60-тан астам білім ұясы салынады.
"Балалар жылы" аясында заман талаптарына сай автобустардың 101-і Түркістан облысының балаларына бөлінді. Бүгін сол автобустардың 71-і ел игілігіне тапсырылды. Тұрғындармен кездесулерде де осы мәселе көтерілетін. Өтініштер орындалды", – деді Дархан Сатыбалды.
Әсіресе, оның айтуынша, таулы аймақтар мен шалғай елді мекендері бар аудандарда қауіпсіз тасымал мәселелері шешіледі. Ендігі кезекте оқу сапасын арттыруға басымдық беру керек.
"Білімді ұрпақ қана әділетті қоғамды орната алады. Бұл ретте білім саласындағы жемқорлықпен күресті күшейткен жөн. Жауапты орган басшыларына да ұсыныс берілді. Қоғамның бұл дертімен өзім бастап күресемін және жауапты басқармаға, білім бөлімі басшыларына да әділдікті сақтауды тапсырамын", – деп түйіндеді әкім.
Айта кетері, "Балаларды тасымалдауға арналған автобустарды сатып алу" инвестициялық жобасы аясында 2022 жылы Түркістан облысына қажетті 101 мектеп автобусын лизинг тәсілімен алу үшін "Өнеркәсіпті дамыту қоры" акционерлік қоғамымен келісімшарт жасалған.
Бұл автобустар облыстағы тасымалданып оқытылатын 56 ауыл мен бастауыш сыныптары ғана бар 124 елді мекендегі 15 мыңнан астам баланы тасымалдайды. Бұған дейін балаларды мердігерлер есебінен – 169 автокөлік және мектеп баланысындағы 19 көлік тасымалдап келген.
Қолданысқа берілген 101 автобустың 71-і 20 орындық болса, 30-ы – 38 орындық. Ең көп автобус Келес, Төлеби, Сайрам, Ордабасы, Сарыағаш және Түлкібас аудандарына жолданды.
