ҚР Ішкі істер министрлігінің өкілдері сексуалдық құлдық мақсатында кәмелетке толмағандарды саудаға салған қазақстандықтың экстрадицияланғанын мәлімдеді, - деп хабарлайды Тengrinews.kz тілшісі ҚР ІІМ Мемлекеттік тіл және ақпарат департаментінің директоры Алмас Сәдубаевқа сілтеме жасап.
"Биыл 13 қарашада ІІМ Интерпол Ұлттық орталық бюро қызметкерлері мен ҚР Бас прокуратура қызметкерлері БАӘ-ден Интерпол іздеу салған қазақстандықты экстрадициялады. Ол ҚР Қылмыстық кодексінің 135-бабының 3-бөлігі ("Кәмелетке толмағандар саудасы") және 128-бабының 3-бөлігі бойынша ("Адам саудасы") қылмыс жасады деген күдікпен іздестірілген болатын", - деп хабарлады Сәдубаев.
Департаменттің мәліметінше, ол кәмелетке толмағандарды заңсыз түрде Біріккен Араб Әмірлігінен Бахрейнге сексуалдық құлдыққа жібермекші болған. Қазіргі уақытта ер адам қамауға алынды.