Астанада бір оқушы сыныптасын қалам сұғып өлтірді
Астанада мектеп оқушысы сыныптасын қаламмен өлтірді, - деп хабарлайды Tengrinews.kz тілшісі Астана қаласы ішкі істер департаментінің баспасөз қызметіне сілтеме жасап.
Департамент мамандарының мәліметінше, екі оқушы арасында жанжал шыққан, соның ақырында олардың бірі оқиға орнында қайтыс болды.
"№76 орта мектептегі оқу процесі кезінде сыныптастар арасында ұрыс шығып, сол кезде оқушылардың бірі екіншісінің кеуде тұсына қалам сұғып алған. Көкірек қуысына салынған жарақаттың салдарынан 8-сынып оқушысы оқиға орнында қайтыс болды", - деп хабарлады баспасөз қызметі.
Бұл оқиға бойынша қылмыстық іс қозғалды. Тергеу әрекеттері жүргізіліп жатыр.
Айта кетейік, оқиға болған мектеп - биыл ашылған төрт жаңа мектептің бірі. Ол Астанадағы Түркістан, Орынбор және Керей мен Жәнібек хандар көшелерінің қиылысында орналасқан.
