Қаржылық мониторинг агенттігінің Павлодар облысы бойынша департаменті Екібастұз қаласында "Богатырь Көмір" ЖШС орта буын басшыларының қылмыстық әрекетін анықтады, - деп хабарлайды Alashainasy.kz тілшісі sputnik.kz-ке сілтеме жасап.
Олар бюджет ақшасын ұрлаған.
"Автобаза директоры кәсіпорында басшылық қызмет атқаратын басқа тұлғалармен жүйелі түрде тауарлық-материалдық құндылықтарды ұрлап, 45,5 млн теңге материалдық залал келтірген деген күдікке ілінді", - деп хабарлайды ҚМА.
Қылмыстық схема көліктердің қосалқы бөлшектерін есептен шығару, жаңасын алу және оларды орнатуды имитациялап, құжаттарға қол қоюдан тұрған. Жаңа қосалқы бөлшектер болмағандықтан арнайы техника істен шығып, ұзақ уақыт жұмыс істемей тұран. Ал жоғарыда аталған тұлғалар жаңа қосалқы бөлшектерді сатып отырған.
Күдіктілер ұсталып, ұрланған жүк көліктерінің қозғалтқыштары мен беріліс қораптары тәркіленді. Олар кінәсін толық мойындады. Осыған байланысты сот "үйқамақ" түрінде бұлтартпау шарасын қолданды.
Бұл факті бойынша сотқа дейінгі тергеу жүргізіліп жатыр. Тергеу мүддесі үшін басқа ақпарат жария етілмейді.