Тува Тайваньның жері ме еді?

Тәуелсіздігі көп елдер тарапынан таныла қоймаған Тайвань елі Ресейдің құрамындағы Тува Республикасын өз жері дейді. Бұл шынымен солай ма?
Серік Алдамжаров, Алматы облысы
Мұндай күрделі мәселеге төрелік айту қиын. Дегенмен бұлай болуының қысқаша тарихын баян еткен артық болмас. Бір кездері Танну-Ұранхай, одан кейін Танну-Тува Ха­лықтық Республикасы деп аталып келген Тува елінің нойондары Ресей импе­рия­сының протектораттығын қабылдауын сұ­рап жүріп, ақыры 1944 жылы автоно­мия­лық облыс ретінде КСРО-ның құрамына енді. Бұған дейін маньчжурлік Цинь им­пе­риясына бағынышты болған бұл ел 1911 жылы Қытайдан тәуел­сіз­дігін жариялаған бо­латын. Алайда Қытай оның тәуелсіздігін таны­ған жоқ. Солай бола тұра Мао Цзе­дунь­нан жеңіліп, Тайвань ара­лына қашып бар­ған гоминьдандық Қытай үкі­меті Тува же­рін өзінікі деп санайды. Қазіргі Тай­ваньда го­миньдандықтар билігінің дәурені бітті. Тә­у­ел­сіздігін ҚХР мойындамай отырған Тай­­­ва­ньның Ресей құрамындағы Туваға шүй­лігуі қи­сынсыз әрі күлкілі сияқты.