Туған жердің түтіні де ыстық
Тәжікстаннан көшіп келген қазақтардың саны қанша екен? Олардың тұрмыс-тіршілігі жайлы білгім келеді.
Анар Нұрбапақызы, Талдықорған қаласы
Бұл сұрақтың жауабын да аталмыш ұйым өкілдерінен білдік:
– Бүгінгі күні «Нұрлы көш» бағдарламасымен Тәжікстаннан 2752 отбасы, яғни 11 657 қазақ Қазақстанға көшкен. Бұл бағдарлама жөнінде ондағы қазақтар жақсы біледі. Елге көшкісі келетіндердің түрлі себептері баршылық, көбінің қалтасы көтермейді, кейбірінің ұлты басқаша болып жазылып кеткен. Биылғы жылы Көкшетау маңындағы «Қызыл жар» қалашығына қоныстанған ағайындар дән риза. Олар келе сала екі айдың ішінде азаматтық та, үй де алған. Қазақстанда жаңа ортаға тез бейімделгені байқалады. Олардың көңіл күйі жақсарып, киім киіс, жүріс-тұрыстары еуропаша болғанын Тәжікстанда қалған қазақтар айтады. Яғни «Отан – оттан да ыстық» демекші, көңіл күйдің өзі адамдарға қуат беретіні аян.
Осы орайда Қытайда тұратын ағайындардың «Нұрлы көшпен» келмек түгілі Үрімжідегі консулдықтан Қазақстанға виза алуының өзі мұң болып жүргені жасырын емес. Бір ауылдан бір ауылға көшу оңай шаруа емес, ал бір мемлекеттен екінші мемлекетке көшу үшін қанша күш-жігер керек? Ал көшемін деген ағайынға қол ұшын берудің орнына кедергі келтіретін, артық айтсақ, кешіре жатсын, намыссыз шенеуніктер қаншама? Осыларды ойлай отырып Тәжік- стандағы Қазақстан Елшілігінің игі істерін насихаттап, кейбір елдегі елшіліктерге үлгі болса дейміз!
