Талант қалай ашылады?

Ерекше дарынды балаларды, әдетте, вундеркинд дейтіні белгілі. Ал баланың осындай айрықша талантын қалай ашуға болады?
Назым ҚАЛИ, Талдықорған
Талант дегеніміздің өзі – әлдебір мәдени құндылық жасауға деген қабілет. Ал дарын – талантты болудың әл-ауқаттық мүмкіндігі. Бар мәселе осы арадан туындайды. Талантты аша білу керек, өйткені мүмкіндік байқала бермеуі ықтимал. Мысалы, Наполеонды бала кезінде мұғалімдер «топас» деп есеп­теген, ал Эйнштейнді сабақ үлгерімінің на­шар­лығына байланысты мектептен қуған. Яғни дарынды балалардың барлығы бірдей өз мүмкіндіктерін талант ретінде жүзеге асыра алмайды. Таланттың ашылуы интел­лект пен еңбекқорлық және шығарма­шы­лыққа бейімділік тәрізді үш негізгі қасиетке байланысты.
Интеллект 40-80 пайыз генетикалық жолмен беріледі. Мәселен, шахматқа жүйрік бала нақты ғылымдарға бейім, интеллектуал ата-аналар отбасында туылуы мүмкін. Ал шығармашылық  дарынға келсек, бұл арада ғылымға да әлі белгісіз жайттар көп. Бала­ның музыкаға немесе суретшілікке бейім екенін дәл анықтап беретін ешқандай ар­на­йы тест жоқ. Белгілі бір аспапта ойнағанына немесе салған суретіне қарап, баланың не нәрсеге таланты барын кәсіби маман ғана таразылай алады.