Стадионға келушілер саны артыпты
«Бұрынғы жылдармен салыстырғанда өткен маусымда ел футболының премьер-лига ойындарында көрермен көп болды» дегенді жиі естіп жүрміз. Сонда стадиондағы көрермендер саны қаншалықты көбейген?
Қуаныш Смағұлов, Семей қаласы
Қазақстан футбол федерациясы өкілдерінің келтірген мәліметтеріне сүйенсек, 2009 жылмен салыстырғанда 2010 жылы стадионда көрермен саны 367 адамға артқан. Яғни өткен жылы премьер-лиганың әр ойынын стадионнан орташа 4137 адам тамашалаған. Бұл соңғы бес жылдағы ең жоғарғы көрсеткіш болып саналады. Айта кетейік, 2006 жылы премьер-лиганың әр ойынына орташа есеппен 3951 адам жиналған болса, 2007 жылы 3578 адамды құрапты. Ал 2008 жылы көрсеткіш 3307-ге дейін төмендеген.
Өткен маусымда бәрінен де Ақтөбе қаласында стадионға жанкүйерлер көп жиналған. Естеріңізде болса, 2009 жылы «Ақтөбенің» әр ойынын орташа есеппен 6823 көрермен тамашалаған болатын. Ал 2010 жылы бұл көрсеткіш 6888 адамды құрапты. Сондай-ақ Қостанайда да футболсүйер қауым едәуір көбейген. Ал Қарағандыда керісінше, стадионға келушілер саны күрт төмендеп кетіпті.
/12.jpg)
