Солақай саясаткерлер кімдер?

13 тамыз солақайлардың халықаралық мерекесі болып саналады. Солақайлар мерекесі қашаннан бері аталып өтеді және солақай саясаткерлер кімдер?
Нұржамал САПАРОВА, Алматы облысы

Бұған қатысты екі түрлі дерек бар. Бірі халықаралық солақайлар мерекесі 1976 жылдан бері аталып өтеді десе, енді бірі британ солақайлар клубының бастамасымен 1992 жылы 13 тамыздан бері тойланады дейді. Бүкіл халық шаруашылығы өнімдері, тұтыну заттары тек оңқайларға арналып жасалғандықтан, солақайлардың құқы ескерілмей қалып жатады. Бұл мерекенің мақсаты – осыған назар аударту. Жұмыр жердегі әр он адамның бірі солақай, яғни 500 миллионнан астам адам солақай болып туылады екен. Адамзат тарихындағы аса танымал солақай адамдардың қатарында Марк Твен, Леонардо да Винчи, Микеланджело, Бетховен, Сергей Рахманинов, Пол Маккартни мен Ринго Старр, Мерилин Монро, Роберт де Ниро, Брюс Уиллис, Анджелина Джоли, Голди Хоун, Опра Унфри, билеушілер Юлий Цезарь, Александр Македонский, Наполеон Бонапарт, Ұлы Карл, Уинстон Черчилль, Жанна Д'Арк, АҚШ президенттері Рональд Рейган, үлкен Джордж Буш, Билл Клинтон, Барак Обама бар. Тіпті В.Путин де солақай екенін жасырып бағады екен.