Сембек сабақ берiп жүр
Анда-санда Мақпал Жүнiсовамен бiрге шығып ән айтқаны болмаса, Сембек Жұмағалиев қалған кездерi көп көрiнбейдi. Сол кiсi өзi әншiлiкпен жай ғана хобби ретiнде айналыспай ма, негiзi, басқа мамандық иесi емес пе? Сол жайлы бiлсем деймiн.
Жазира БОТАҚАРА, Ақтөбе қаласы
Расында, Сембек Жұмағалиев жылт етiп көрiнуге құмар әншi емес. Бiрақ, сiз ойлағандай, әншiлiкпен қосымша айналысатын басқа маман иесi де емес, нағыз өнердiң адамы. Жас кезiнде Мақпал Жүнiсовамен бiрге «Ғашықтар жырын» айту арқылы танылған Сембек Жұмағалиевтен көрермен көп жылдар бойы көз жазып қалды. Оның себебi сол тұста әншi Алматыдан кетiп, Атырау жастар ансамблiне жетекшiлiк етiптi. Сонда жүрiп шаңырақ көтердi, бүгiнде Әлинұр есiмдi алты жасар ұлы бар. Алайда жастық шағының куәсi, үлкен өнердiң ортасы – Алматыға қайта оралу Сембек Жұмағалиевтiң көкейiнен бiр сәтке де кетпептi. Сонымен, 2004 жылы Алматыға келiп, қазiр Қазақконцертте жұмыс iстейдi, сонымен қатар Жүсiпбек Елебеков атындағы эстрада-цирк колледжiнде дәрiс бередi.
