Республикалық мектеп-интернатқа қала балаларын қабылдай ма?
Балам биыл 7 сыныпты бітірді. Қазақ тілі мен әдебиеті пәндеріне бейім. «Айгөйлек» балалар журналына өлеңдері шығып тұрады. 8 сыныптан бастап Алматыдағы Республикалық қазақ тілі мен әдебиетін тереңдетіп оқытатын мектеп-интернатта оқысам деп отыр. Бұл мектеп-интернатқа қала балаларын қабылдай ма?
Несібелі ЕСКЕЛДИЕВА, Алматы қаласы
Назира Жақыпбекова, Алматыдағы Республикалық қазақ тілі мен әдебиетін тереңдетіп оқытатын мектеп-интернат директорының оқу-ісі жөніндегі орынбасары:
– Біздің мектеп-интернаттың мекенжайы: Алматы қаласы, Митин көшесі, 6 үй (Достық көшесінің қиылысы). Негізінен, республиканың барлық аймақтарынан ауыл балаларын қабылдаймыз. Кей жағдайда, аса білімділігін дәлелдеп жатса, ондай қала балаларын да қабылдаймыз. Сондықтан балаңыздың құжаттарын бізге әкеліп тапсырып, талаптарымызбен танысқаныңыз дұрыс. Жалпы, оқушылар қазақ тілі мен әдебиеттен ауызша және жазбаша емтихан тапсырады. Емтиханда 5-7 сынып бағдарламасы қамтылады. Қосымша мәліметті біздің мекенжайдан келіп алуыңызға болады.
