Қазақстанның Туында ғана жанды бейне бар

Дүбірлі спорттық жарыстарда көптеген елдердің мемлекеттік тулары желбірейді. Кейбіреуін ажырату қиын. Әлемдегі ұқсас туларды қалай ажыратамыз?
Арман БАЯХМЕТ, Шығыс Қазақстан облысы
Әлем елдері арасында мемлекеттік тулары арасында ұқсас мемлекеттер бар. Мысалы, еуропалық елдердің басым көпшілігінің мемлекеттік жалаулары үш жолақты келеді. Үш түсті жолақтар кей­бірінде тігінен орналасса (Франция, Ита­лия, Ирландия, Бельгия, Румыния, Мол­дова, т.б.), енді бірінде көлденеңінен (Гер­мания, Нидерланды, Болгария, Сло­ве­ния, Ресей, т.б.) тұрады. Сонымен қа­тар солтүстік еуропалық елдердің жа­лау­ларына айқыш белгілер тән болып келеді. Тек түстерінде ғана айырмашылықтар бар Скандинавия (Финляндия, Швеция, Дания және Норвегия) елдерінің тулары сол мем­ле­кеттердің бір-біріне жақын екенін көр­сетеді. Ал ұқсас байрақтарға келер болсақ, Ирландия мен Италияның туларын бір-бірінен ажырату қиынырақ. Италия жала­уын­да (солдан оңға қарай) жасыл-ақ-қызыл болса, Ирландия жа­сыл-ақ-қыз­­­ғылт-сары түстерді  таңдаған.  Осындай ұқсастық Оң­түс­­тік Америка құрлығын мекендейтін Арген­тина мен Уругвайда да бар. Аргентинаның жалауында күннің бейнесі орта тұсында, ал Уругвайдың туында сол жақ бұрышында бейнеленген. Егер АҚШ, Либерия және Ма­лайзияның байрақтары алыста желбіреп тұр­са, ажырата алмауыңыз мүмкін. Себебі аталған мемлекеттердің туларында қызыл-ақ көлденең жолақтар бар. АҚШ-тың жа­лауында Құрама Штаттарды бейнелейтін 50 жұлдызша болса, Либерияда үлкен бір жұлдыз, ал Малайзияның туында ай мен шоқ­жұлдыз орналасқан. Егер әлем елдерінің мемлекеттік туларын қарап шықсаңыз, ең әдемі, мәнді және жанды бейне салынған тек Қазақстанның ғана мемлекеттік байрағы еке­нін байқайсыз.