«Қазақстан балалары» – қандай бағдарлама?
Елімізде «Қазақстан балалары» деген атпен арнайы бағдарлама жұмыс істейді деп естіп едім. Оның мақсаты неде және нақты қандай мәселелерді қамтиды? 
Нұрзада Алдабергенқызы, Ақтөбе қаласы
Елімізде Үкіметтің 2009 жылы арнайы қаулысымен 2007-2011 жылдарға арналған «Қазақстан балалары» Бағдарламасы жұмыс істейді. Бұл бағдарламаның мақсаты – балалардың өмір сүру сапасын әлеуметтік және құқықтық кепілдіктерді қамтамасыз ету жолымен жақсарту болып табылады.
Бағдарламада әсіресе әлеуметтік жетімдіктің алдын алуға және ата-анасының қамқорлығынсыз қалған балаларды орналастырудың альтернативті түрін дамыту үшін шаралар қолдануға көп көңіл бөлінуде. Осы мақсатпен республика бойынша жетім балалар мен ата-анасының қамқорлығынсыз қалған балаларға арналған балалар үйі мен мектеп-интернаттарды кезең-кезеңмен қысқартып, отбасы түріндегі мекемелерге ауыстыру, ата-анасының қамқорлығынсыз қалған балаларға арналған отбасы түріндегі балалар ауылын ашу жоспарланған. Сонымен қатар жоспарда ерекше күтімді қажет ететін баласы бар отбасылармен әлеуметтік жұмыс түрі мен мүмкіндігі шектеулі балаларды әлеуметтік бейімдеуді қамтамасыз ету бойынша кешендік іс-шаралар әзірлеу, ерекше күтімді қажет ететін баланы тәрбиелеп отырған заңды өкілге ай сайын мемлекеттік жәрдемақы тағайындау, қоғамға балаларды бейімдеу үшін қолайлы жағдай жасау қарастырылған.
