Пітір-садақа беру – уәжіп
Биыл Алматы қаласы бойынша пітір-садақаның мөлшері 100 теңге болып бекітілді деп естідім. Ал еліміздің кейбір аймақтарында пітір-садақаның мөлшері өзгеше екен. Осы дұрыс па? Дұрыс болса, неге олай?
Дәурен ЕРМЕКБАЙҰЛЫ, Алматы қаласы
Пітір-садақа Рамазан айында бір жылдық бас амандығы үшін беріледі.
Әр адам не отбасы мүшесі пітір-садақаны «келесі Рамазан айына аман-есен жеткіз» деген тілек-ниетпен беруі керек. Көпшілік пітір-садақа беруді далада қол жайып отырған қайыршыларға садақа берумен шатастырады. Ал базбіреулер пітірді ауызашарға барғанда мешіт имамына беріп жатады, ол дұрыс емес. Пітір-садақаны адам өз қолымен мешітке әкеліп беруі керек.
Қазақстан мұсылмандары дiни басқармасы тарапынан биыл бекiтiлген бiр пiтiр-садақаның көлемi Алматы қаласында 100 теңге (2 келі бидай құны). Ал еліміздің әр аймағында бұл көрсеткіштің әртүрлі болуы қазiргi нарық талабына сәйкес. Республиканың әр жерiнде пiтiр-садақаның мөлшерi әрқалай болуы жергілікті жерлердегі бидай құнымен байланысты.
