Компания қызметкері қаза болды. Артында жары мен екі баласы қалды. Қызметкердің өмірі қамсыздандырылғандықтан, сақтандыру компаниясына хабарласып едік, ондағылар аннуитет шартын бекітуді ұсынды. Осы дұрыс па?
Рыскүл БИБАТЫРОВА, компания есепшісі
Қызмет барысында еңбеккердің денсаулығы мен өміріне қауіп келуіне байланысты жұмыс берушінің «Азаматтық-құқықтық жауапкершілігін міндетті түрде сақтандыру туралы» заң сақтандыру шартын екі кезеңде бекітуді қарастырады. Біріншісі – барлық жұмыс берушілер жалпы сақтандырумен айналысатын компаниялармен шартқа отыруы тиіс. Қызметкер жарақат алып немесе мерт болған жағдайда жалпы сақтандырумен айналысатын компания төлемді өмірді сақтандырушы немесе аннуитеттік компанияға аударады. Аннуитеттік компанияны зардап шегуші немесе оны асырауында болған тұлғалар таңдайды. Жұмыс беруші сол компаниямен тағы бір шартқа отырады. Ай сайын төленетін төлемдердің мөлшерін аннуитеттік компания Азаматтық кодекске сай есептеп шығарады.