Мемлекеттік ономастикалық комиссия немен айналысады?

Ел аумағындағы жер-су және өзге де нысандардың атауларын өзгерту мемлекеттік ономастикалық комиссия құзырына жата ма? Бұл комиссия нақты қандай міндеттерді жүзеге асырады?
Нұрбақыт СӘЛЕНҰЛЫ, Алматы облысы
Мемлекеттiк ономастика комиссиясы гео­гра­фиялық объектiлердiң атауына бiр­ыңғай көзқарасты қалыптастыру, топоно­микалық атауларды қолдану мен олардың есебiн жүргiзудi реттеу, еліміздің тарихи-мәдени мұрасының құрамдас бөлiгi ретiнде тарихи атауларды қалпына келтiру, сақтау және оларды қайта атау мақсатында ономастика саласында мемлекеттiк тiл сая­сатын iске асыру жөнiндегi ұсыныстарды әзiрлейтiн консуль­та­циялық кеңесу органы болып табылады.
Аталған комиссияның өздігінен жер-су аттарын өзгертіп, шешім қабылдауға құзы­реті жүрмейді. Алайда комиссия белгілі бір нысандар атауының өзгертілуіне ұсы­ныстар жасап, оң ықпал ете алады. Белгілі бір объектi­лердiң жаңадан берiлген, қайта аталған жә­не нақты­ланған атауларын бе­кi­тудi комис­сия­ның нақты қорытындысы болған кезде ғана белгiленген тәртiппен ел Үкiметi жүзеге асырады.
Комиссияның негiзгi мiндеттерi:
• географиялық атауларды жинақтау, жүйе­лендiру және зерделеу, ономастика жө­нiнде ғылыми негiзделген сөздiктер құ­растыру;
• бұрын жоғалтылған тарихи топонимдердi қалпына келтiру жөнiнде ұсыныстар енгiзу;
• жаңа географиялық объектiлер үшiн атаулар әзiрлеуге қатысу.
Комиссия өзiне жүктелген мiндеттердi шешу мақсатында қалыптасқан мәде­ни-тари­хи және әлеуметтiк факторлардың қолданылып жүрген нормаларының негi­зiнде физикалық-географиялық объек­тi­лердiң атаулары транскрипциясына нақ­тылаулар енгiзу туралы даулы мәсе­ле­лер бойынша қорытынды шығара алады.