Күлкінің пайдасы қаншалық?
«Күлкі – денсаулық мүлкі» деген сөз бар. Әйтсе де күлкінің денсаулыққа қаншалықты пайдасы бар?
Еркін НҰРАҚЫН, Талғар
Психологтердің айтуынша, жарты сағаттық күлкі адамның өмірін әлдеқайда жақсарта алады. Себебі күлкінің стресті жағдайларда көмектесетін, сонымен бірге ұйқының жайлылығы мен ағза жұмысының қалыптылығын арттыратын қасиеті зор.
Сарапшылар күніне ең аз дегенде 30 минут күліп жүруге кеңес береді. Адам организміне жағымды әсер ететін күлкінің арқасында жүрек, өкпе, бауыр сияқты ішкі органдар жұмысы әлдеқайда оңтайлы реттеледі. Күлкінің пайдасы – клиникалық тәжірибе жүзінде әлдеқашан расталған нәрсе. Позитивті адамдар жұмыс барысында да, маңайындағылармен қарым-қатынас кезінде де үлкен мүмкіндіктерге ие. Күлкі иммундық жүйенің белсенділігін арттыра отырып, адамның бойында эндорфин мен энкефалин тәрізді табиғи «есірткінің» өндірілуіне себепкер болады.
Әлемдік статистикаға жүгінсек, осыдан жарты ғасыр бұрын адамдар орта есеппен алғанда күн сайын15 минуттай күліп жүрген болса, қазіргі адамдар күніне 5 минутқа жуық қана күлетін көрінеді.
