Конструкторлық бюролар көлік жасауға үйретпек
Көлік жасауды үйрететін конструкторлық бюролар ашыла ма? Мұндай бюролар қай аймақтардан ашылады?
Әрсен ҒАЛЫМБЕКОВ, Алматы
Қазірде көліктік машина жасауға байланысты Өскемен, Петропавл, Астана қалалары бюро құруға лайық деп танылып отыр. Алдағы уақытта аталмыш қалаларда төрт конструкторлық бюро ашылып, мұнда арнайы мамандардың жұмыс істеуіне жағдай жасалмақ.
Жалпы, Көлік және коммуникация министрлігінің мәліметінше, мемлекеттік қолдаудың жүйелі атқарылуы арқасында 2011 жылғы 11 айда Қазақстанның машина жасау саласындағы өнім өндіру көлемі 447 млрд теңгеге жетті. «Негізінен, қолға алынған инновациялық жобаларды іске асыру барысында дизельді локомотивтер шығару шарасы оң нәтиже беріп келеді» дейді мамандар. Жалпы, машина жасауды дамыту индустриялық бағдарламасына сәйкес еліміз 2014 жылға дейін 59 жобаны іске асыруы керек. Бұл жобалардың сапында инвестиция көлемі 2,3 млрд теңгені құрайтын, қуаттылығы жылына 50-60 кеме шығаратын Баутинар кентіндегі кіші кеме шығару зауыты да енгізілген. Міне, осындай нақты жобалар жоспарда бар екенін ескерген отандық машина жасау саласының мамандары аталмыш жобалардың іске асуы үшін алдымен елде конструкторлық бюролар ашу керектігін баса ескертіп отыр.
