Ең алғаш газет қашан, қай елде жарық көрген?

Қағаздың ең алғаш Қытайда пайда болғанынан хабарым бар. Ал ең алғаш газет қай елде басылып шыққан? Сондай-ақ қазақ тіліндегі газет қашан және қай жерде жарық көрді?
Тұғырым ҚЫЗЫРХАН, Алматы облысы
Мерзімді баспасөздің ең негізгі әрі көне түрлерінің бірі — газет. Қағаз өндірісінің дамып, полиграфиялық технологияның бастапқы тәсіл­дерінің жетілдірілуіне бай­ланысты алғашқы газеттер Батыс Еуропа елдерінде шыға бастады. Нақтырақ айтар болсақ, Гер­манияда — 1609 жылы, Ұлы­британияда — 1622 жылы, Францияда 1631 жылы алғашқы басылымдар жарық көрген екен.  Қазақ тіліндегі алғашқы мер­зімдік басылым — «Түркістан уә­лая­тының газеті» деген атпен 1870 жылы Таш­кент қаласында жарық көрген. Бұл басылым қазақ дала­сында Ресей им­периясының отар­лаушылық саясатын жүргізудің құралы ретінде дүниеге кел­генімен, ұлттың баспасөзін қалып­тас­тырып, зиялы қауым­ның азаттық идея­ларын бұқараға жеткізуде баспасөздің маңызы зор екендігін түсінуіне ықпал етті.