«Эфир» деген не?

Қазір теледидарларда тікелей эфирде өтетін бағдарламалар көп. Жалпы, «эфир» сөзінің мағынасы қандай?
Рауан Ұларбекұлы, Қостанай қаласы

Көптеген танымдық анықтамалық­тарға сүйенсек, «эфир» сөзі грек тілінен аударғанда «ауаның жоғарғы қабаты» немесе «жоғарғы ауа» деген мағына береді. Бұл құбылыстың қазақ тіліндегі баламасы – «әуе толқыны».
Тікелей эфир – тележурналистикада уақыт дәлдігін сақтап, жедел хабар таратудың кәсіби әдісі, шығармашылық-техникалық сипаттағы соңғы технология­лық прогресс, аудиториямен қарым-қатынастың айрықша тәсілі, өзгеріске ұшырамайтын нақты құбылыс. Түптеп келгенде, алуан түрлі пішіндер мен жанр­лық ерекшеліктерді қамтып, бір мезгілде атқарылатын бірнеше істің басын қосатын ұжымдық үйлесім мен жүргізушінің лингвистикалық және пси­хологиялық белсенді іс-әрекетінің нәтижесінде жүзеге асатын қызмет жүйе­сі.
Экран алдында сөйлейтін жүргізуші болғанымен, оның артында техникалық тетікті ретке келтіретін, эфирді әуенмен әрлеп, сөзбен көмкеретін, әрбір іс-қимы­лыңды қалт жібермей, дәлдікпен түсіретін студия операторлары, оператордың түсірген суретін эфирге шығарушы режис­сер, дыбыс режиссері, телефон қоңы­рауын эфирге қосатын өзге де техникалық қызметкерлер бар.
Осы тұрғыдан келгенде, тікелей эфир – бір мезгілде атқарылатын бірнеше істің басын қосатын ұжымдық үйлесімнің нәти­жесінде жүзеге асатын іс-әрекет.
«Айтылған сөз атылған оқпен тең» деген халықтық нақыл уақытқа тәуелді құбылыс, тікелей эфирдегі жұмыс проце­сінің ең негізгі ережесі деуге әбден бо­лады.