Дар ойыны деген не?
Дар ойыны деген қандай ойын түрі? Мен бұл атауды естігенмен, нақты анықтамасын біле алмай келемін. Осыны анықтап түсіндіріп бере аласыздар ма?
Нұрқанат, Алматы
Энциклопедиялық анықтамалықтар керілген арқан үстінде көрсетілетін ойын-сауықтың Орта Азиядағы атауы «Дар ойыны» деп аталғанын жазады. Бұл ойын түрі XV ғасырда Батыс Еуропада жәрмеңке сайқымазақтарының сауығы ретінде пайда болды. Дар ойыны Ресейде XVIII ғасырда тарай бастады. ХІХ ғасырда қазақ даласында дар ойынының кейбір элементтері үлкен жәрмеңкелерде көрсетіле бастады. Ойынға қатысушыларды «даршы» деп атаған. Олар ұлттық мейрамдар мен маусымдық жәрмеңкелерде көпшілікке ойын-сауық көрсеткен. Ол ойын түрі ұрпақтан-ұрпаққа беріліп отырған. Ол асқан ептілік пен жүректілікті қажет ететін ойын. Оған үздіксіз жаттығу мен машықтану керек. Даршылардың ойын көрсететін негізгі құралы – ұзын әрі жеңіл екі бөрене, сырық пен арқан болған. Кейде арқан орнына сым да қолданылған. Даршылық өнер әсіресе Ферғана, Бұхара, Қоқанда кең өріс алды. Кеңес заманында ойынның бұл түрі цирк өнерінің құрамдас саласы ретінде қайта туып, жаңаша сипатта жедел қарқынмен дамыды. Қазір бұл ойын түрі қазақ жерінде тек цирк өнерінің бір түрі ретінде ғана қолданылып жүр.
