Бойы өспесе, мырыш жетпейді деген сөз

Балам 6-сыныпта оқиды. Қатарластарынан бойы жағы­нан артта қалғаны байқалады. Соған қарап, баламның бойы өспей қала ма деп қауіптенемін. Бұл жөнінде дәрігерлер қандай кеңес берер екен?
Сәния МАЙҚАНОВА, Қызылорда облысы
Әлбетте, адам бойының өсуі алдымен тұқымға  байланысты. Дегенмен ана құрсағында жат­қан кезінен бастап, ер жеткенге дейінгі кезеңде баланың тамақ­тану рационы да оның жетілуіне әсер етеді. Бұл ғылыми тұрғыда дәлелденген. Сондықтан дәрі­гер­лер бой өсуі тежеліп тұрған балаларға мырыш жетпеуі мүм­кін дегенді айтады. Өйткені мырыш иммун жүйесінің қалып­ты қызмет етуіне және бойдың өсуіне ықпал етеді. Ол нуклеин қышқылдары мен ақуыз синтезі үшін қажет. Сондай-ақ көміртек айналымына қатысатын көпте­ген маңызды ферменттің құра­мына және инсулин гормонына кіреді.  
Жеңіл сіңетін мырышқа бай өнімдер – мал мен құс еті, сыр, сүт, көкөністер. Қолжетімді мы­рыш­тың қайнар көздерін дәнді дақылдар, мұқият тартылған ұннан пісірілген нан немесе фитат және фенолға бай өзге де өсімдік өнімдерімен алмастыру мырыш тапшылығына әкеледі, сөйтіп оның бойдың өсуіне тигізетін кері әсерін күшейтеді.
Балаларға мырыш жетіспесе, бойдың өсуі мен жыныстық да­муын тежейді, сондай-ақ ағза­ның инфекцияларға қарсы күре­сін әлсіретеді.