«Бард» сөзінің мағынасы қандай?

Өнер әлемінде дарынды адамдарды шығармашылық сипатына қарай әртүрлі сипатқа бөліп қарастырып жатамыз. Мысалы, кешегі өткен Табылды Досымовты елі-жұрты бард ақын деп таныды. Осы тұрғыдан алғанда «бард» сөзінің қандай түсініктемесі бар?
Жансая МЕДЕТҚЫЗЫ, Ақмола облысы
Қазақы жөнге салсақ, «бард» сөзі жырау деген мағынаны береді. Ал жыраулық дәстүр халқымызға жат дүние емес. Бұл жөнінде көнедегі жыршы-термелердің кейінгі жалғасын­дай болған марқұм табылды Досымовтың өзі де айтып, жазып та кеткен. Ақынның өз сөзімен айт­сақ: «Бардизм португал халқының гитарамен айты­латын жеңіс жырларынан бастау алады. Кеңес Одағының тұсында жайлап орыстарға жеткен, содан бүкіл Одаққа тарады. Расында, бұл жанрмен алғаш шыққандардың бірі және танымал болғаны Владимир Высоцкий болатын. Жұрт жақсы қабылдамаса, Высоцкий сондай атақты болмас еді. Бардизмнің ең басты ерек­шелігі – өлеңнің мәтіні бірінші орында тұрады. Де­мек, мұнда әуен өлеңді халыққа жеткізетін көмекші құрал ғана. Бұл өнерге қазақ оқшау қарамауы керек деп ойлаймын. Ерекше бөліп айта кетерлігі, көше әндерін, авторлық әндерді орындаушылар өздері шығарған әнді мәтінімен айтады. Бұлар­ды бардистер деуге келмейді, оларда, негізінен, әуен бірінші кезекте тұрады. Сөзінде мән бола бермейді. Айырмашы­лық – осы. Жалпы, халыққа жеткізгісі келгенін әуен­мен беру бізде бұрыннан бар деп айтуға бола­ды. Сонау ғасырдан ғасыр асып жеткен жы­рау­лық дәстүрімізде, өткеннен мұра болып қал­ған айтыс өнерінде де өрілген өрнекті сөзді әуен­мен жеткізу бар. Сондықтан бард қазақ­тан алшақ ұғым деп айта алмаймыз. Айырма­шы­лық – тек аспабында ғана. Қазақтар домбы­ра­мен, қобызбен сүйемелдесе, нағыз бардтық шы­ғарма гитарамен айты­лады. Кешегі жаугер­ші­лік заманда да ха­лық­қа, батырларға рух бер­ген осы сынды әндер ғой. Ақын жүрегіндегі қа­һар­мандық сөздерін осы арқылы жеткізді. Бард – біздіңше, жырау. Демек, бұл өнердің еш­кім­ге де жаттығы жоқ. Ол бізге тән емес неме­се басқа халықтікі деп бөліп қарасақ, ұтыла­мыз».