Баланың жынысы кімге байланысты?
Менің үш қызым бар. Күйеуімнің туыстары үшінші қызыма аяғым ауыр кезімде «енді ұл тап, қыздарды топырлата бермей» дегенге де барды. Баланың ұл-қыз болуы менің еркімде болса, тек ұл бала туа беретін едім ғой... Сәбидің жынысы кімге байланысты, әкесіне ме, әлде шешесіне ме?
Нұргүл ҚАЙЫПОВА, Оңтүстік Қазақстан облысы
Сұрағыңыз өте орынды. Біріншіден, баланың жынысы Жаратушы Алланың қалауына байланысты. Бұл туралы Құранда: «Кімге қаласа, қыздар, кімге қаласа, ұлдар береді. Немесе ұлдар мен қыздарды жұп-жұбымен береді. Сондай-ақ қалағанын бедеу қылады. Күдіксіз, Ол – толық білуші, аса күшті!» («Шура» сүресі, 49-50-аяттар), – делінген. Бұған Алланың қалауымен тарихтағы ешқашан ер тимеген Мәриямның Иса пайғамбарды дүниеге әкелуі, ал Зәкәрия пайғамбардың қауқары кетіп, қартайған шағында бедеу әйелінің бала тууы дәлел.
Екіншіден, Ньюкасл университетіндегі британдық зерттеушілер баланың қандай жыныста туатындығы ерлерге қатысты екендігін анықтады. Әйел адам балаға Х хромосомасын ғана жеткізуге қабілетті болса, ер адам қыз тудыратын Х, ал ұл тудыратын У хромосомасын бере алады. Сондықтан баланың ұл не қыз болуы тек әкесіне ғана байланысты екеніне күмәніңіз болмасын.
