Авиамодель дегеніміз қандай спорт?
Теледидардан авиамодельді спорт туралы бағдарламаны тамашалаған менің баламның спорттың осы түріне аңсары артып жүр. Авиамодельді спортпен шұғылдану үшін қайда бару керек?
Әйгерім ҚҰСМАН, Астана қаласы
Бұл сұраққа жауап алу үшін ұлттық федерация басшысы Андрей Митковскийге жолығып мынандай жауап алдық.
– Спорттың бұл түрі еліміздің барлық аймағында бар. Алайда басқа қалаларға қарағанда Алматыда әлдеқайда жақсы дамыған. Шынын айту керек, авиомодельді спорт түрімен өз ісіне шын берілгендер ғана айналысады және де шеберлікті арттыру үшін көп уақыт қажет етеді. Бұл спортпен көбіне бұрын ұшқыш болуды армандап, алайда сол биікті бағындыра алмағандар айналысады. Бір ұшақтың немесе тікұшақтың құны 10000 АҚШ доллары көлемінде тұрады. Сондықтан да оны екінің бірінің қалтасы көтере бермейді. Алайда спорттың бұл түрінде жыл сайын әлем чемпионаттары өтіп келеді. Жас мөлшеріне қарай өтетін бәсекеге дүниежүзінен 1000-нан аса авиамодельші қатысады. Осыған қарап-ақ әлемде авиамодельді спорт түріне қызығушылардың саны өте көп екенін біле аламыз.
