Әріптестерінің денесін тапқан төтеншеліктер марапатталды

Осыдан екі ай бұрын Балқаш көліне батып кеткен облыстық Төтенше жағдайлар департаментінің және өрт сөндіру қызметі мамандарының денесін іздеуге атсалысқан азаматтардың еңбегі ескерілді ме екен?
Сәбит Нұрланов, Алматы облысы

Қарағанды облыстық апаттан құтқару қызметі мамандарының хабарлауынша, Қазақстан Республикасы төтенше жағдай­лар жөніндегі министрі Владимир Божко­ның бұйрығымен Балқаш көліндегі іздес­тіру жұмыстарына жедел атсалысып, азамат­тық борышын адал орындаған төрт азамат марапатталды. Ведомство бас­шысының Құрмет грамотасы Приозерск қаласының тұрғыны Хамит Мұсабековке тапсырылды. Ал қала әкімі Нұрлан Бікіров, ҚР Қорғаныс министрлігіне қарас­ты Әуе қорғаныс күштерінің 44841әскери бө­лімінің командирі Қуат Мұс­тафин және РФ Қорғаныс министрлігі «Сарышаған» по­лигонының командирі, полковник Павел Мырча алғысхатқа ие болды. Есте­ріңізге сала кетейік, бұл қайғылы оқиға сәуірдің 22-сінде болған еді. Ауа райының жайсыздығынан көлде дауыл тұрып, «Казанка» моторлы қайығы аударылған болатын. Төрт адам тереңге батып кетіп, екі азамат аман қалды.
Марқұмдардың денесін іздеу тура бір айға созылды.