«Алаш жастары» қандай бірлестік?

Жақында «Алаш жастары» атты бірлестік құрылыпты деп естіп едім. Оның мақсаты қандай?
Ғалым ОРАЗБЕКОВ, Талдықорған қаласы
«Алаш жастары» – «Жас Отан» жастар қанаты жанынан құрылған қоғамдық бірлестік. Оның негізгі мақсаты – шетелде оқитын қазақ­стандық студенттердің басын қосу, олардың түрлі проблемаларын шешуге атсалысу. Сонымен қатар жаңа құрылған бірлестік студент­тердің әуе қатынасында, туристік, медициналық, құқықтық қызмет­тер бойынша жеңілдіктер алуын қам­тамасыз етіп, түрлі мәдени шаралар, қайырымдылық акция­ларын, ғылыми шаралар өткізбек. Бірлестік жетекшілерінің айтуын­ша, шетел­дердегі студенттеріміз оқу кезінде қаржылық, құқықтық, ме­ди­ци­налық қиындықтарға ұшы­ра­сып жатады. Біздің еліміздің дип­лома­тиялық өкілдігі барлық қалада жоқ. Сондықтан жастарға өз проблема­ларын өз бетімен шешуге тура келеді. Мұнымен қатар шетел­дегі қазақстандық студент­тердің білім алуын үйлес­тіріп отыратын ортақ ұйым жоқ, шетелге кәсіби маман­дардың кетуі­не, студенттердің шетел­дер­дегі әрекетіне мониторинг жүргізіп отыру қажеттігі де бар. Бұл бірлес­тіктің құрылуына басты себеп­тердің бірі – осы. Қазіргі уақыт­та ресми дерек бойынша, шетел­дерде 12 мыңнан астам, ал бей­ресми мәліметтер бойынша, 30 мың қазақстандық студент білім алуда.