«Қазақстанды таныту» жобасы таныстырылды

«Қазақстанды таныту» жобасының идеясы Елбасының отандық бұқаралық ақпарат құралдарымен 2012 жылғы желтоқсандағы кездесуінен кейін пайда болды. Президент журналистермен бейресми кездесуде: «Қазіргі жастарға біздің халқымыздың бірегей тұрмысы мен мәдениетінің сипатын телевизия арқылы ұсынылатын айрықша жобалар арқылы ашып көрсетуге болады деп ойлаймын. Ал мұны түсінікті тілмен және заманға лайық форматпен жасау қажет», — деп еді. Елбасының сол ойын іске асырған «Қазақстанды таныту» телевизиялық жобасы кеше Астанадағы «Қазмедиаорталық» ғимаратында таныстырылды.
«Қазақстанды таныту» тележобасы қа­зақ халқының мәдениеті мен тұрмысы ту­ра­лы баяндайтын, екі минуттан аспайтын 10 бейнероликті қамтитын топтама Нау­рыз мейрамы күндері «Қазақстан» және «Ха­бар» телеарналарында көрсетіле бастады.
Бейнероликтердің өзіндік ерекшелігі – оларда көркем бейнетүсірілім мен графи­каның, көрнекі арнайы эффектілер мен ай­тулы фактілердің үйлесім табуында.
«Қазақстан» РТРК» АҚ басқарма төр­айымы Нұржан Мұхамеджанова жобаның тұсаукесерінде: «Бейнероликтер тақырып­тары халқымыздың өмірінің айшықты тұс­тарын танытуға арналған. Бұл роликтер шын мәнінде еліміз үшін мақтаныш сезімін оятатын қазақтың ұлттық брендтері тура­лы. Өте түсінікті тілде ұсынылып отыр. Мұ­ны жасауға бізге «Кемел ел» деп аталатын өндіруші студия өз көмегін көрсетті», – деп атап өтсе, «Хабар» агенттігі» АҚ басқар­ма­сы төрағасының орынбасары Алмагүл Ах­мет­жанова жобаның жастарға арналған­ды­ғына тоқталды. «Жоба қазақ халқының ұлттық және мәдени бірегейлігін танытады. Біз дәстүрге айналған, баршаға таныс дү­ниелерді басқа қырынан, заманауи тұрғы­дан көрсетуге тырыстық. Бұл бейне­ро­ликтер жастар үшін қызықты болар деген үміттемін», — дейді А.Ахметжанова.
Топтамада қамтылған тақырыптардың бәрі кез келген аудитория үшін қызықты әрі танымдық мәні бар. Олар: Асық ату ойы­­нының тәртібі; Қазақ тілі (тарихы мен жаз­басы, байлығы мен бейнелілігі); Музы­ка­лық аспаптар және шығармашылық (дом­быра жасау үрдісі: қобыздың ерекше­лік­тері, айтыс өткізу тәртібі); Қазақ күресі­нің та­ри­хы мен ережелері; Тазы тұқымы­ның ерекшеліктері; Ұлттық әшекей түрлері; Ер­же­туге байланысты мерекелер; Қымыз да­йындау және оның шипалық қа­сиеттері.
Роликтегі басты рөлдерге кино және спорт жұлдыздары түсті. Қазақ балуаны, «Қазақстан барысы» республикалық тур­ни­рінің жеңімпазы Бейбіт Ыстыбаев ұлттық күрестің айрықша қуаты мен айбарын та­ныт­са, актриса Бибігүл Сүйіншәлина қа­зақ­тың ұлттық әшекейлерінің өзгеше тар­тым­дылығы мен әсемдігін паш етті. Асық тура­лы роликті түсіру барысында кәдімгі қала ба­лалары ауыл балаларының ара­сына ба­рып, асық ойынының әдіс-тәсіл­дерін мең­гер­се, мыңнан астам музыкалық аспап жа­са­ған шебер Мұса Әділов дом­бы­ра туралы роликтің басты кейіпкеріне ай­налды. Мұса домбыра жасаудың қыр-сы­рымен егжей-тегжейлі таныстырды. Қазақ тілі туралы бей­нероликте қазақ тіліне қы­зы­ғушылық танытып, мемлекеттік тілді оқып-үйренуге ша­қырған алматылықтар көрініс тапқан. Ро­ликте қазақ жазба тілінің дамуының төрт кезеңі қысқа да нұсқа түр­де баяндалған, Александр Пушкин, Уиль­ям Шекспир және Мұхтар Әуезовтің сөз қол­даныстары салыс­ты­рыла отырып, қа­зақ тілінің байлығы мен тереңдігі ашып көр­сетілген. Сонымен бірге ер адамның жас ерекшеліктерінің 15 түрде айтылуын ер­екше айшықтап көрсету қазақ тілінің көп­қырлылығын аңдатады.
Бейнероликтер жыл бойы «Қазақстан», «Хабар», «Ел арна», Kazakh TV, 24KZ, «Бi­лiм» телеарналарынан көрсетіледі. Соны­мен бірге оларды Youtube желісінен тама­шалауға да болады, ал фотоматериал мен тақырыптық суреттер Flickr фотохостин­гінде орналастырылған.
«Қазақстанды таныту» жобасы халық­тық жобаға айналады деп жоспарланып отыр. Таяуда жалпы жұртшылықтың қаты­суымен Отанды сүю тақырыбына арналған бейнеконкурс басталмақ. Қатысушылар 90 секундтық дербес қысқа бейнероли­гін­де өзінің туған өлкесімен, оның көрікті жер­лерімен, тағдыры қызық тұлғаларымен және айрықша дәстүрлерімен танысты­рады. Яғни өз Отанына сүйіспеншілігін та­ны­тып, әлемнің Қазақстанға ықыласын оя­татын нәрсенің бәрін қамтиды.
Жобаның тұсаукесер рәсіміне дейін БАҚ өкілдері арасында асық ойнаудан ша­ғын жарыс ұйымдастырылып, нәтижесін­де ер жігіттерді сұрмергендігімен қапы қал­дыр­ған «Заң» апталық газетінің тілшісі Тыныс Ахметжан жеңімпаз атанып, арнайы сыйлықты иеленді.