Ақын аруағын қорлаған кім екен?
Тайпақта туған тарланбоз ақын Сағат Әбдуғалиев туралы ашық айтылып, елене бастағаны күні кеше ғана. Соңғы екі жылда ақынның өлеңдері екі рет жинақталып, кітап болып басылғанымен, 60 жылдығын атап өте алмадық.
Мерейтой жылы ақын аруағы алдында атқарылған ең үлкен екі шараның бірі «Арыс» баспасынан (директоры – Ғарифолла Әнес) шыққан «Жүрегіме жүгі түсті жаһанның» атты жинақ болса, екіншісі Орал-Атырау күре жолының бойында, Сағат мәңгі тыныс тапқан Тайпақтағы зират тұсында қойылған ескерткіш белгі еді. Ақын талантына бас иген жергілікті азаматтардың жеке қаражатына орнатылған бұл белгі – Әбдуғалиевке арналған алғашқы ескерткіш құнды болатын. Ақынды білетін, жырларын сүйетін адам болса, жол бойына тоқтап, аруаққа дұға бағыштап, оның бір-екі жырын жатқа айтып кету дәстүр болып қалыптасып келе жатқан еді.
Жақында жолымыз түсіп, сол жерден тағы өттік. Әдеттегіше ескерткіш белгіге жақындағанда жанымыз жабырқап кетті. Әлдекім ескерткіш тақтаның суреті мен мәтінін әдейілеп ұрып, аяусыз бүлдіріпті. Кісі бойынан биік орнатылған белгіні тұғырымен бірге суырып, жолдың келесі бетіне лақтырып тастапты. Бір адам емес, ұйымдасқан топтың ісі. Тірлігінде тағдырдың таяғын бір кісідей-ақ жеген Сағаттың «сыбағасы» әлі таусылмағаны ма?
