Абай жыры әр тілде оқылды
Таяуда «Ұлы Абайға – 165 жыл» деген ұранмен Халықаралық «Мирас» мектебінде ұлы ақынның мерейтойына арналған салтанатты кеш өтті.
Кешке балабақша бүлдіршіндерінен бастап, жоғары сынып оқушыларына дейін атсалысты. Кеште ұлы ақынның өлеңдері оқылып, әсем әндері шырқалып, аудармалары айтылды. Ақын кешін ұйымдастырып, оның жоғары деңгейде өтуіне жетекшілік жасаған «Мирас» мектебінің оқу ісінің меңгерушісі Кеншенбаева Жәмила Мәжитқызының еңбегі зор. Абай оқуларына арналған мұндай үлкен кеш «Мирас» мектебінде алғаш рет өтіп отыр. Мектеп оқушылары өз өнерлерін қазақ, орыс, ағылшын, француз, неміс тілдерінде қалың көрерменге паш етті.
Шараны тамашалауға мектеп ұстаздары мен оқушылары ғана емес, ата-аналар да көптеп қатысты. Бұл кеш оқушыларға ерекше бір қанат бітіріп, шабыттандырғандай болды. Олар ұлы ойшыл атамыздың өлеңдерін өздері қазақ, орыс, ағылшын, неміс, француз тілдерінде оқи отырып, бірін-бірі тыңдап, ерекше әсерге бөленді. Кешті ұйымдастырушылар бұл игі бастаманың алдағы уақытта да дәстүрлі түрде жалғасын табатынына сенім білдіріп отыр.
