20 мың долларға фильм түсіруге болады
Жақында Лев Гумилев атындағы Еуразия ұлттық университетінің студенттері айтыскер-ақын, жазушы Баянғали Әлімжановтың сценарийі бойынша түсірілген «Асау толқын» фильмін тамашалады. Жалынды жастық кезінде адамның асау толқынға мініп, кейде жаман мен жақсыны ажырата алмай кететіні рас. Ондай кезде сабырға шақыратын ақылдың болғаны дұрыс. Ал оның негізі қайда? Әрине, ұлттық тәрбиеде. Осы филоcофияны арқау еткен фильмнің Астанадағы көрсетілімі кезінде кинозал жастарға лық толды.
Бұған дейін «Асау толқын» фильмі Көкшетау қаласында алғаш рет көрсетілген кезде де залда ине шаншар жер болмады. Сол кезде аталған кино бір күн емес, үш күн қатарынан көрсетілді. Көрермен бір сәтке де толастамады. Себебі «Асау толқын» фильмінде бүгінгі жастардың өмірі, мәдениеті мен тәрбиесі ашық көрсетілді. Жақсылық пен жамандық, зұлымдық пен мейірім арпалысқан өмір соқпағында өскелең ұрпақтың шалыс баспай, жамандыққа ұрынбай жетілуіне, адамгершілік пен ізгілік сияқты қасиеттерді бойына сіңіріп, қалыптасуына шақыратын фильмнің тағылымды тұстары көп. Автор оның бәрін жастардың студенттік өмірі арқылы шебер көрсете білді. Фильм жастарға тікелей тіл қатып, сауал қоя отырып жақсылық пен жамандық, таңдаған өмір жолының мағынасы туралы ойларын оятуға тырысады. Бұл үлкендердің жастарға: «Қайда барасыңдар? Кім болып бара жатырсыңдар?» деген жанайқайы іспетті. Негізгі әңгіме – қатыгездік, рэкетирлік жолға түскен колледж студенттері мен олардың зорлығына қарсы шыққан жас ғашықтар туралы. Әртүрлі өмір жолын таңдаған жастардың бітіспес қақтығысы ауыр жағдайларға әкеліп соғады. Әйтеуір, үзілмей қалған нәзік үміт қана көңілге медеу болады. «Көркем фильмде жақсы ісімен сүйсіндіретін жағымды кейіпкердің де, жағымсыз кейіпкердің де бейнесі шынайы кескінделген. Көрермен жақсыдан үйренетінін, жаманнан жиренетінін топшылап, айқын аңғара алады. Ақан сері атындағы мәдениет колледжінің оқушылары Данияр Тұранов, Жансая Сейітқалиева, Данияр Құлмағанов, Гүлнұр Қожанованың тырнақалды рөліндегі қаҺармандарының қылықтары жүрек қарып, көпшілік үйлеріндегі балаларын ойлай бастағаны, «мұндайдан құдай сақтасын» дегені залдағы күбір-күбірден байқалды. Сондай-ақ киноға кешегі сенатор, бүгінгі бас дәрігер Серік Аяғановтың, облыс әкімінің бұрынғы орынбасары, ардагер ағамыз Болат Жанәділовтің түсуі, олардың өз кейіпкерлері арқылы жастар тәрбиесіндегі қоғамдық ықпалды бейнелеуі толғантпай қоймайды», – дейді журналист Бақберген Амалбек.
«Паң Нұрмағамбет» киностудиясы түсірген «Асау толқынның» сценарий авторы әрі қоюшы режиссері ақын, драматург, киностудияның көркемдік жетекшісі Баянғали Әлімжанов болса, продюсерлері – Марат Нәбиев және Арнұр Нұрқатов. Қоюшы операторлары – Мұхтар Ержанов пен Виктор Пузырников. 2006 жылы құрылған киностудия бұған дейін «Ән мен анаша», «Аран», «Айқан» және тағы басқа фильмдерді түсірді. Шыны керек, ол шығармалар қарапайым техниканың негізінде түсірілсе де, халқымыздың бүгінгі өмірін боямасыз түрде көрсетуімен құнды. Осы орайда «Паң Нұрмағамбет» киностудиясының ашылуына қолдау көрсеткен ақын Әскен Нәбиевтің баласы Марат Нәбиевтің еңбегін ерекше атап өткен жөн. Киностудияны ашқан кезде, кәсіпкер М.Нәбиев былай деп айтқан көрінеді: «Шығармашылық жұмысты өнер азаматтары басқаруы тиіс. Оған саясат пен ақша араласпауы қажет. Себебі ақша болған жерде өнер өспейді. Қалаған шығармаңызды түсіріңіз, ал қаржы жағын мен өзім қамтамасыз етемін».
Баянғали ӘЛІМЖАНОВ, «Асау толқын» фильмі сценарийінің авторы әрі қоюшы режиссері:
– «Асау толқын» – бұл студент-жастар туралы фильм. Әрине, бір кино жастардың барлық өмірін қамтиды деп айтқан қате болар. Себебі бір шығармамен тұтас бір өмірді қамту мүмкін емес. «Асау толқын» – бүгінгі жастар өмірінің бір қыры. Ол фильм арқылы біз теріс кетіп бара жатқан жастарға «Әй, бұларың қалай?» дегендей болдық. «Асау толқын» фильмі – Ақан сері атындағы Көкшетау мәдениет колледжі студенттерінің дебюті, олар алғаш рет фильмге түсіп отыр. Балалар оған қатты қуанды. Әрине, біз «Қазақфильм» емеспіз. Ондай техникалық мүмкіндіктеріміз жоқ. Екі камерамыз бар. Соның шопыры, есепшісі, режиссері, сценарисі – бәрі-бәрі жалғыз өзім (күлді). Осы фильм он төрт күннің ішінде бас-аяғы 20 мың долларға түсірілді. Бұл – бір клиптің ақшасы. Солай емес пе?
