Туризм – табыс көзі һәм тәрбие құралы

Оралда халықаралық ынтымақтастық жылына орай «Білім. Туризм. Интеграция» тақырыбында халықаралық форум өтті. Оған еліміздің жоғары оқу орындары мен туристік бірлестіктерінің, қосымша білім беру мекемелерінің өкілдері және Ресей Федерациясының Батыс Қазақстан облысымен шектесіп жатқан көршілес бес облысымен қатар, Красноярск, Мәскеу, Таулы Алтай өңірінен келген 200-ден астам маман қатысты.
Форумның Жайық жаға­сын­дағы әсем шаһар Оралда өтуі тегіннен-тегін емес. Өйткені еліміз бойынша балалар ту­ризмімен айналысатын барлығы 21 ор­талық болса, соның 14-і осы Батыс Қа­зақ­стан облысында орналасқан. Ақжайық өңірінің балалар туризмін, жалпы, туризмді дамыту бағытындағы әлеуетінің қан­ша­лықты зор екендігін осыдан-ақ байқауға болады.
Виктор ФОМИН, БҚО балалар-жасөспірімдер туризмі және экология орталығының директоры:
– Өскелең ұрпаққа туристік, эко­логиялық тәрбие беру өте маңызды деп айтар едім. Мысалы, орындықта тапжылмай отырып берілген білім мен табиғат аясында айтылған әңгіменің санаға сіңімділігін салыстыратын бол­сақ, әрине, таразы басын табиғат басып кетеді. Неге? Себебі сынып бөл­месі төрт қабырғамен шектеулі, ауа тар, соған сәйкес оқушының қабыл­дау қабілеті де енжар. Ал табиғат аясында барлық сезім мүшелері бел­сенді жұмыс істейді.
Бүгінгі таңда «Батыс Қазақстан об­лы­сында туристік кластерді дамытудың 2010-2012 жылдарға арналған жоспары» жа­салды. Туристерге маркетингтік ақпарат бе­ру үшін «Ақ Жайық өңіріндегі туризм мен саяхат» атты қазақ, орыс, ағылшын тілдерінде көркем безендірілген кітап шығарылды. Онда табиғат және демалыс орындары, жануарлар дүниесі, сауықтыру орталықтары, қонақүйлер, мәдени-ойын сауық орталықтары – бәрі-бәрі қамтыл­ған.