Полицейлер тұрғынды тонап кеткен күдіктіні анықтады
Түркістан қалалық полиция басқармасына жас жігіттің тонау туралы арызы келіп түсті. Жәбірленушінің айтуынша, қалалық саябақтардың бірінде оған белгісіз біреу шабуыл жасап, ұялы телефонын тартып алған. Ұрланған ұялы телефонның құны 100 мың теңгеден асады.
Аталған жайтты тәртіп сақшылары ҚР ҚК-нің 191-бабы "Тонау" бойынша тіркеп, күдіктіні іздестіру бойынша жедел шаралар қабылдады.
Түркістан қалалық полиция басқармасының полицейлері жедел-іздестіру іс-шараларын жүргізу нәтижесінде, «ізін суытпай» тонау қылмысына күдіктіні анықтады. Ол облыс орталығының тұрғыны болып шықты.
Қазіргі таңда тонау дерегі бойынша сотқа дейінгі тергеу амалдары жүргізілуде. Ұрланған телефон заңды иесіне қайтарылды. Болған оқиғаның толық мән-жайы анықталуда.
Түркістан облысы ПД баспасөз қызметі
