Пандемия кезіндегі ауруханалардың рөлі: Алматылық науқастар дәрігерлерге алғысын білдірді
Қазақстан коронавирустың жаңа толқынымен күресуде. Қазірдің өзінде күніне үш мыңға жуық науқас тіркелгенімен, өткен жылдың жазымен салыстырғанда денсаулық сақтау жүйесіне айтарлықтай ауыртпашылық түсіп жатқан жоқ. Ауруханаларда төсек орын тапшылығы байқалмайды, тұрғындар тиісті ем шараларымен қамтамасыз етілуде.
Мамыр айының басындағы мәліметтерге сәйкес, инфекциялық ауруханалардың 42%-ы, жансақтау бөліміндегі төсек-орынның 28%-ы бос емес.
"Коронавирус инфекциясының таралуын ескере отырып, біз төсек орындарының дайындығын қамтамасыз ету бойынша шаралар жүргіздік. Еліміздегі кереуеттердің саны 62 мыңды құрайды, оның 36 мыңы - инфекциялық ауруханаларда, 3 мыңнан астамы - жансақтау бөлімінде орналасқан. Тағы 23 мыңы резервте тұр ", - деді денсаулық сақтау министрі Алексей Цой үкімет отырысындағы есебінде .
Жаңадан салынған ауруханалар мен инфекциялық станционарларға қайта бейімделген мекемелер денсаулық сақтау жүйесінің шамадан тыс жүктелуіне жол бермеді. Еске салайық, Қазақстанда өткен жылы рекордтық мерзімде 16 инфекциялық ауруханасы бой көтерген еді.
Медициналық жабдықтармен толық қамтамасыз етілген қосымша ауруханалық кереуеттер елдің барлық ірі қалаларында пайда болды. Пандемия кезінде қысқа уақыт ішінде құрастырылған инфекциялық ауруханалар індетке шалдыққан науқастарды қабылдайтын негізгі орынға айналды. Диагностика мен емдеуді сапалы жүргізуге барлық жағдай жасалып, науқастың жайлылығына ерекше назар аударылды. Сонымен қатар, аурухана ғимаратында ауаны дезинфекциялау және залалсыздандыру жүйесі орнатылды. Қажет болған жағдайда жаңадан тұрғызылған ауруханалардың сыйымдылығын тез арада екі есеге арттыруға болады. Қазіргі күні еліміздің 14 өңірінде жасақталған осындай медициналық орталықтары мен дәрігерлердің жинақтап үлгерген тәжірибесі коронавирустың кейінгі толқындарында жағдайдың ушығып кетпеуіне мүмкіндік берді.
Осыған орай, біз көп бейінді инфекциялық ауруханаларда емделіп шыққан тұрғындардан ауруханалардың жағдайы мен көрсетілген ем шаралары жайлы сұрап білген болатынбыз.
"2021 жылы 1 ақпанда былтыр ашылған инфекциялық ауруханаға түстім. Бұл жерге үйге шақыртқан жедел жәрдем алып келді. Бір айта кетерлігі, маған коронавирус емес, пневмония деген диагноз қойылды. Менің тек дене қызуым көтерілгендіктен, алғашында қандай ауруға шалдыққанымды анықтау қиынға соқты. Басқаларына қарағанда көбірек емделдім. Мұнда науқастарға ыңғайлы жағдайлар жасалған. Мәселен, сынамалар жасатқанда немесе компьютерлік томографиядан өткенде алысқа барудың қажеті жоқ, барлығы бір жерде орналасқан. Аурухананың жаңа болғаны да өзіме ұнады. Өте ыңғайлы, палаталарда жеке-жеке душы мен әжетханасы бар, ешқайда шығудың қажеті жоқ. Дәрігерлер мен медициналық мекеменің басқа да қызметкерлері өте жайдары, күніне үш-төрт рет кіріп жағдайыңды сұрап отырады. Сауығып шыққан соң денсаулығыңызда кейбір өзгерістер болады деп кеңестер жазып берді. Екі аптада толығымен жазылдым", - дейді Руслан Максутов.
Руслан Максутов
Жаңа инфекциялық ауруханада емделіп шыққан тағы бір қала тұрғыны Әлішер Дүйсехан дәрігерлердің жауапкершілігін жоғары бағалады.
"Алғашқы екі аптада үйде емделуге тырыстым. Бірақ кейіннен жағдайым нашарлап, дәм мен иіс сезбей қалдым. Шамамен, наурыздың басы болатын. Тест тапсырғаннан кейін жедел жәрдем жаңа инфекциялық аурухана алып барып жатқызды. Ол жақта жеті күндей емделдім. Ең ұнағаны, дәрігерлер денсаулығыңды жиі тексереді және соған байланысты күнделікті еміңді өзгертіп отырады. Мәселен, таңертең сынамалар өткізсең, түске дейін мамандар жағдайыңа баға беріп, ем шараларын бекітеді. Дәрігерлердің қамқорлығы мен жауапкершілігі анық аңғарылады. Науқастармен дос ретінде араласып, сөйлесіп, денсаулығың жайлы біліп отырады. Палатамыз кең, үш адам жаттық. Қажетті азық-түлікпен, құрал жабдықтармен аурухананың өзі қамтамасыз етеді. Әрбір бөлмеде ауа желдеткіш бар, суық не ыстық болса, пайдаланатынбыз. Үйде емделгенде жағдайым нашарлай берді, бірақ ауруханаға түскен соң үш күннен кейін өзімді жақсы сезіндім. Сол үшін дәрігерлерге алғысымды жеткіземін", - дейді Әлішер Дүйсехан.
Айта кетсек, көп бейінді инфекциялық аурухана құрамында тоғыз клиникалық бөлім, 28 орынды жансақтау бөлімі бар. Жансақтау бөлімінде 28 тыныс алу аппараты орналастырылған. Сондай-ақ, ауруханада компьютерлік томограф, қан газдарының, электролиттер мен метаболиттердің анализаторы, электрокардиограф, мониторлар, перфузорлар, жедел диализ жүйесі, аксессуарлары бар медициналық диагностикалық рентген жүйесі, ультрадыбыстық аппараттар, бактерицидтік шамдармен жабдықталған.
Пандемиядан келіп-кетер зиянды азайту үшін мемлекет қолдан келгенше тырысып бақты. Бірінші кезекте, инфекция асқынған елдердегі жағдайдың қайталанбауын алдын алу және медициналық жүйеге тиетін ауыртпалықты болдырмау негізгі міндетке айналды. Кейбір мемлекеттердің коронавирустың толқындарына дайын еместігі байқалды. Мәселен, бүгінгі күні Үндістан коронавирустың таралуына төтеп бере алмады: елде күніне төрт жүз мыңнан астам науқас тіркеліп, ауруханаларда орын тапшылығы туындауда.
Елімізде коронавирус эпидемиясы басталғалы бері 281 708 адам аурудан емделіп шықты. Пандемия басталғалы бері отандық дәрігерлер COVID-19 жұқтырған пациенттерді емдеуде үлкен тәжірибе жинақтады. Аурудың әртүрлі ауырлық дәрежесіндегі науқастар үшін емдеудің жеке тәсілдері құрылды.
