Маңғыстау облысы Түпқараған ауданындағы «Маңғыстаумұнайгаз» АҚ-ның Қаламқас кен орнындағы ұңғымалардың бірінде апатты жағдай орын алды.
Маңғыстау облыстық ТЖД-нің баспасөз қызметінің хабарлауынша, 20 ақпан күні сағат 10:25-те «Маңғыстаумұнайгаз» АҚ-ның диспетчерінен «Қаламқас» кен орнындағы №5759 ұңғымада жерасты жөндеу жұмыстарын жүргізу кезінде ұңғыманы жабуға арналған жабдықтың сыртындағы келте құбырда қарқынды газ-су ағыны орын алғаны туралы хабарлама келіп түскен. Ешкім зардап шекпеген. Адамдарды қауіпсіз жерге шығару жұмыстары жүргізілген жоқ.
«Оқиға орнына 14 кәсіби құтқарушыдан құралған жедел атқыма ұңғымаға қарсы топ пен Маңғыстау облыстық ТЖД-нің жедел тобы шықты», - деп мәлім етті Маңғыстау облыстық ТЖД баспасөз қызметінің өкілі Гүлнәр Қожабекова.
Оның айтуынша, нысанның технологиялық процесі тоқтатылған жоқ. Апат сағат 17:20-да жойылды. Штабтың шешімі бойынша, одан кейінгі технологиялық жұмыстарын (ұңғыманы өшіру) «ММГ» АҚ өкілдерінің тікелей бақылауымен «ОСК» ЖШС-нің мамандары жүргізді, деп хабарлайды lada.kz.