Әлемнің 1-ракеткасын жеңген Елена Рыбакина жартылай финалға шықты
Қазақстанның бірінші, әлемнің 6-ракеткасы Елена Рыбакина спорттық жолында алғаш рет Рим WTA 1000 турнирінің жартылай финалына шықты, - деп хабарлайды Alashainasy.kz тілшісі "ҚазАқпарат"-ға сілтеме жасап.
Қазақстандық теннисші ширек финалда әлемнің 1-ракеткасы, Польша өкілі Ига Швентекпен ойнады.
Осыған дейін қарсыластар өзара үш рет кездесіп, соның екеуінде биыл Е.Рыбакина жеңген еді.
Бірінші партияда Ига Швентек 4:0 есебімен алға кетіп, сол қарқынынан жаңылған жоқ – 6:2.
Екінші сетте де Ига 4:2 есебімен алда тұрды. Дегенмен Елена қайыра брейк жасап, таразы басын теңестірді. Содан кейін тай-брейкте жеңісті жұлып алды – 7:6 (7:3).
Үшінші, шешуші партияда есеп 2:2 болған мезетте Швентек жарақатына байланысты матчты жалғастырудан бас тартты.
Екі сағат 19 минутқа созылған бәсеке барысында Рыбакина 10 эйс жасап, 1 брейк-пойнтты мүлт жібермеді. Қарсыласы 1 эйс, 3 брейкпен (10 брейк-пойнт) көзге түсті.
Осылайша, биыл Елена әлемнің бірінші ракеткасын үш рет ұтты.
Е.Рыбакина финалға шығу үшін әлемнің 20-ракеткасы, латвиялық Елена Остапенкомен таласады. Ол ширек финалда тартысты кездесуде испаниялық Паула Бадосаны жолдан тайдырды – 6:2, 4:6, 6:3.
Еске сала кетейік, бұдан бұрын Елена Рыбакинаның Римде әлемнің бірінші ракеткасымен ойнайтынын жазған болатынбыз.
Сондай-ақ, Тимофей Скатов Ролан Гаррос турниріне дайындалып жатыр.
Анна Данилина жұптық сында Париж жарысының жартылай финалына өтті.
