Желтоқсаншы Ләззат Асанованың анасы Алтынай Асанова қайтыс болды, деп хабарлайды Express Qazaqstan.
Алматы қаласында тұрған зейнеткер Алтынай Асанова көзі тірісінде қызының атын ақтап алу үшін барын салды. Бастауыш мектепте мұғалім болып жұмыс істеген Алтынай Асанова "Желтоқсан" оқиғасынан кейін "Халық жауының анасы" деген күйе жағылып, жұмыстан шығып қалған. Қызының қазасынан кейін қан жұтқан ана Ләззаттың атын ақтап алу үшін талай табалдырықтарды тоздырды.
— Мен анамын. Бес бала тәрбиелеген, өмірге әкелген, солардың қызық-шыжығын көрген анамын! Қазақ даласын қалың ұйқысынан оятқан ұлы Желтоқсан ұлт-азаттық көтерілісінің құрбаны марқұм Ләззат Асанова секілді ержүрек, халқын шынайы сүйген арудың анасымын! Кезінде қорланып, мына қас-қағым өмірден он екіде бір гүлі ашылмай, өкініш пен қасіретті артына, мына мен бейбаққа мәңгілікке тастап кеткен Ләззаттың анасымын! Мәңгілік арман мен өкінішті кеудеме құйып, содан арылмастай етіп, қанша жыл өтсе де, заман өзгеріп, дүние жаңарып, еліміз Тәуелсіздікке ие болып, егемен атанып жатса да қайғы-мұңы бір сәт ортаймайтын анамын! — деп жазған еді Алтынай Асанова өзінің "Ақжазықтың аймаңдай аруы" атты кітабында.
Желтоқсан оқиғасынан кейін Алтынай Асанованың денсаулығы сыр беріп, екінші топ мүгедегі болып қалған. 2013 жылы тұла бойы тұңғышы Ләззат туралы жазылған мақалалар мен естеліктерді жинақтап, кітап қылып шығарды. Ол өмірінің соңына дейін қаршадай қызын сағынып, оны өзін-өзі өлтірді дегенге сенбей кетті.