Жексембин үшемдерге үй берді

Газетіміздің №27, (5.03.2009) санында «Үшемнің несібесі қайда?» атты тақырыппен Жолтаева Гүлмира Сәтмақанқызының алты баласымен пәтерден пәтерге көшіп жүргені жайында жазғанбыз. Айтарын тиісті жерге жеткізе алмай бір жыл бойы сандалған ана қыстың көзі қырауда Тараз қаласынан редакциямызға арнайы келген еді.
Біздің мақаламыз жарық көргеннен кейін бірнеше күннен соң-ақ 8 наурыз әйелдер мерекесі қарсаңында Жамбыл облысының әкімі Бөрібай Жексембин көпбалалы ананы арнайы құттықтап, үй-жаймен қамтамасыз етуге қала әкімі Ілияс Тортаевқа нұсқау береді. Газет бетінде балаларын асырау үшін жас ананың үшемдері жеті-сегіз айлық кезінде мей­рамханада ыдыс-аяқ жуушы болып істеуге мәжбүр болғаны, ай сайын балаларының жәр­демақысы ретінде алатын 12 мың теңгенің пәтерақыны да өтемейтіні егжей-тегжейлі айтылған болатын. Осы мәселені ескерген облыс әкімі Тараз қаласының әлеуметтік қамсыздандыру бөліміне әке қам­қор­лығынан тыс қалған отбасы үшін әлеу­меттік көмек көрсетіп отыруды да міндет­тейді.
Ал арада бір ай шамасы өткен соң, 15 сәуір күні «Тұрғын үй» мемлекеттік комму­налдық-қазыналық кәсіпорнының дирек­торы Е.Ұлықпанов 1996 жылғы Қасиет, 1997 жылғы Әділет, 2006 жылғы   Нұрсұлтан, 2008 жылғы Әділжан, Сабыр­жан, Са­ли­хат есім­ді бес ұл мен бір қыздың анасы Жол­таева Гүл­мираға үш бөл­мелі пә­тердің кілтін тап­сырады. Үшемі ту­ғалы бір жыл ішінде төрт рет пәтер ауыстырып, пә­тер зар­дабын тартып жүр­ген көп­балалы ана қуан­ға­нынан ертеңіне-ақ жаңа қонысқа көшіп алыпты.
«Тыңдалмаған сөз же­­тім» дегендей, ай­тыл­ған сөзіміздің ескеру­сіз қал­май, Жам­был об­лы­сы­ның әкімі Бөрібай Жек­сем­биннің назарына ілі­­гіп, мәселенің оң шешім тапқанына біз де қуандық. «Әкім бол, халқыңа жақын бол» дегенді қаперіне алып, жұртына жанашырлық ете білген облыс әкіміне «Алаш айнасы» газетінің атынан риза­шылығымызды біл­діреміз!
Гүлмира Жолтаева, көпбалалы ана:
– Ең бірінші, Аллаға, екінші, жанай­қайым­ды облыс әкіміне жеткізе білген «Алаш айнасы» газетіне алғысым шексіз. Жамбыл облысының әкімі Бөрібай Жек­сем­бин, Тараз қаласының әкімі Ілияс Тортаев мырзаларға да алты баламның атынан ризашылығымды білдіремін. Алла еңбектерінің жемісін берсін! Ал ақпарат айдынына шыға сала, халықтың жана­шырына айналып, айтылған сөзі жерде қалмай жатқан «Алаш айнасы» газетіне «алдағы уақытта да айтарларыңыз бен жазарларыңыз таусылмасын, әрбір Алаш жанұясының шаңырағынан табылар ба­сылымға айналғайсыздар» дегім келеді.