Жас ғалым Хантәңірі шыңында қаза тапты

Физик ғалым әрі талантты альпинист Әділет Имамбеков өмірден озды. Спортшының мәйіті Хантәңірі шыңынан табылды.

Марқұмның туыстары мен достарының хабар­лауынша, қайғылы оқиға өткен сәр­сенбі күні таңертең белгілі болған. Хантә­ңірі шыңының 5300 метр биіктігінде Имам­бековтің мәйіті шатыр ішінде табыл­ды. Әзірше оның неден қайтыс болғаны белгісіз. «Әділеттің өліміне ауа райының қолайсыздығы себеп болды ма, басқа жағдайлар ма – бізге еш нәрсе белгісіз. Біз­дің білетініміз – ол бұл шыңға бір емес, бір­неше рет көтерілген еді. Басқа да биік­тіктерді талай бағындырған тәжірибелі аль­пинист болатын», – дейді оның досы Саят Сатыбалдиев. Әділет Имамбеков 1981 жылы дүниеге келген. Мәскеу фи­зи­ка-техникалық институтын үздік дип­лом­мен тамамдаған ол АҚШ-тағы Гарвард уни­верситетінің аспирантурасында білім алды. Осы университетте философиядан РhD докторы ғылыми дәрежесіне жетті. Ол – Гарвардта мұндай атақты қорғаған тұңғыш қазақ. Физика мен математика бойынша бірнеше ғылыми жұмыстың авторы, Йель және Райс универ­си­тет­терінің профессоры. Оның шыңға өрмелеу спортындағы жетістіктері де бір төбе. Айрықша дарын иесінің сүйегі кеше Алматыға жеткізілді. Ата-анасы мен туыстары, дос-жарандары оны бүгін ақтық сапарға аттандырмақ.