Шымкентте «Наурыз» алаңы ашылды

Жыл өткен сайын Шымкент қаласындағы тарихи-мәдени құндылықтар көбейіп келеді. Жуырда соның жарқын дәлеліндей ірі сәулеттік алаң халық игілігіне берілді. Иә, Наурызды тоғыз күн тойлау оңтүстіктен бастау алған еді. Соның жалғасындай күні кеше пайдалануға берілген аталмыш нысанның атауы «Наурыз» алаңы деп аталады. Қала халқын қуанышқа бөлеген «Наурыздың» салтанатты ашылуына Оңтүстік Қазақстан облысының әкімі Асқар Мырзахметов, шаһар басшысы Дархан Сатыбалды, сондай-ақ зиялы қауым мен қаламыздағы түрлі диаспора өкілдері, өңір тұрғындары қатысты.
Облыс әкімі Асқар Мырзахметовтің тіке­лей басшылығымен қолға алынған «Нау­рыз» алаңы бір гектардан астам ау­мақты қамтиды. Облыстық бюджет есе­бі­нен қаржыландырылған бұл нысанға 100 млн теңге жұмсалған. Құрылыс жүр­гізуші – «Заңғар-Сәулет» ЖШС-і.  Бұл ау­мақта «Ауы­лым – алтын бесігім» атты ба­рельефті композициясы, қазақтың салт-дәстүрін көрсететін «Көкпаршы», «Қыз қуу», «Теңге алу», «Бүркітші» кейіптері көр­сетілген сәу­леттік декоративтік элементтер орна­лас­тырылған.
Асқар МЫРЗАХМЕТОВ, Оңтүстік Қазақстан облысының әкімі:
– Бүгінде қаламызда халық саны кө­бейіп, шаһардың ауқымы ұлғайып жатыр. Сол себепті Шымкентте жаңа әкімшілік орталық бой түзеп, қаланың тынысы ке­ңеюде. Елбасы Нұрсұлтан Назарбаевтың бас­тамасымен еліміздегі үшінші қала мәртебесін иемденген қаламызда хал­қы­мыздың салт-дәстүрінен терең сыр шер­тетін «Наурыз» алаңы ашылып отыр. Бұл – келесі жылы құрылысы толықтай аяқ­та­латын этносаябақтың бір бөлігі. Келешекте бұл саябақ тұрғындардың емін-еркін сейіл құратын сүйікті демалыс орнына айналады.
Бұдан соң алаңға жиналған қауым ашық аспан астында ұйымдастырылған ме­ре­келік концертті тамашалады. Об­лыстағы қала, аудандар тіккен киіз үйлерге аялдап, қазақы дастарқаннан дәм татты. Шара барысында қаламызда тұратын барша диаспора өкілдері театр­лан­ды­рылған қойылым ұсынып, халықтар ара­сындағы тату-тәтті тіршілігімізді паш етті. Қала жастарынан құралған 300-ге жуық студент пен мектеп оқушылары үлкен алаң­да көпшілікті қазақтың қасиетті «Қара жорға» биімен тамсандырса, «Тұмар» фольклорлық оркестрі әдемі әндерімен сүйсінтті.  Сондай-ақ осы «Наурыз» алаңы­ның ашылу рәсіміне арнайы келген қазақ­тың дүлдүл ақыны, «Алаш» әдеби сый­лығының иегері Қасымхан Бегманов сахна төрінде сылқым жырын жатқа оқып, жұртшы­лықтың жүрегін елжіретті.
Нұрлан АРХАБАЕВ, Шымкент қалалық сәулет және қала құрылысы бөлімінің басшысы:
 – Шаһардың шығыс солтүстігінде орналасқан «Ипподром» аумағынан бас­тап, Бәйдібек би ескерткішіне дейінгі аумақта этно-тарихи тематикалық сая­бақтың, облыстық мұражай және әдет-ғұрып орталығының эскиздік жобасы жасалған. Жобаның жалпы құны – 2 мил­лиард теңге. 50 гектар жерді алып жатқан этно-тарихи саябақ аумағында облыс көлемінде орналасқан тарихи ма­ңызы бар кесенелер мен ескерткіштердің шағын­далған макеттері орналастырылатын бола­ды. Облыстық мұражай және әдет-ғұрып орталығының құрылыс жұмыстарына ағым­дағы жылы облыстық бюджеттен қаражат қарастырылып, жұмыстар қар­қынды жүргізілуде.
Келешекте бұл аумақта айтулы мәдени көпшілік шаралар өткізіліп, бірыңғай сәу­леттік кешен қала тұрғындарының сүйікті демалыс орны болып қалыптаспақ.