Семейдегі теміржол көпірі апатты жағдайда тұр

Семейдегі Ертіс өзені арқылы өтетін теміржол өткелі құлаудың аз алдында тұр. 80 жылдық тари­хы бар көпір осы уақытқа дейін бірде-бір рет күрделі жөн­деу көрмеген. Алғаш болып көлік прокуратурасы дабыл қағуда.
Бұл көпір Қазақстан мен Ресей Федера­циясын, сондай-ақ еліміздегі алыс-жақын шет мемлекеттерді жалғап тұрған күрета­мыр десе болады. Бір тәулік ішінде қарт Ертіс­тегі осы теміржол өткелі арқылы 40-қа тарта пойыз өтеді. Оның ішінде жо­лау­шылар және жүк пойыздары да бар. Таяуда көпірді қатаң тексеруден өткізген көлік прокуратурасы оның қауіп төндіріп тұрғанын анықтады.
Дулат СЕРІКБАЕВ, Семей қаласының көлік прокуроры:
– Ертіс өзені бойындағы теміржол көпірі апатты жағдайда. Аталған көпір 1929 жылы салынған. Содан бері күр­де­­лі жөндеуден өткізілмеген. Проку­ра­турамен жүргізілген тексеріс бары­сы­н­да бірнеше заңбұзушылық анық­тал­ды. Бұл көпір Қазақстан Республикасы мен Ресей Федерациясын бірге қосады. Сон­дықтан да бұл объект стратегиялық жағы­нан маңызды болып табылады. Аталған факт бойынша бас көлік проку­ратурасына ақпарат жолданды.
Прокуратурадағылардың мәліметінше, осыған дейін көпірдің су астындағы бетон­дары ағымдық жөндеуден өткен. Ал үстіңгі бөлігі сол қалпы қалып қойыпты. Бүгінгі таңда өткелдің пойыз өтетін жерлеріндегі темір конструкцияларына қатты зақым келген.
Әзірше көпір үстінде ешқандай апат орын ала қойған жоқ. Тек «қауіпсіздік үшін» деп өткелден өтетін пойыздардың жылдам­дығына шектеу жасалды. Бұрын сағатына 45-50 шақырымды бағындыратын жүрдек темір көліктер қазір небары 25 шақырым жылдамдықпен қозғалуда. Тағы бір айта кетерлігі, өткел стратегиялық нысан бол­ған­дықтан, оған 30,40 жылда бір рет күр­делі жөндеу жүргізілуі тиіс. Көлік проку­ра­турасындағылардың айтуынша, «Қазақстан теміржолы» АҚ бюджет тапшы­лығына байланысты осы уақытқа дейін көк тиын қаржы бөлмей келген. Іс насырға шап­пай тұрғанда төтенше жағдайдың алды алынса жарар еді.