«Кезінде нәубет заманның кесірінен ұлтымыз таңғажайып құнды музыка аспаптарынан айырылып қала жаздады. Мынау қытайлар түсірген «Шыңғысхан» телесериалын көрген кезде мен қатты әсер алдым. Өйткені ондағы ойналатын музыкалық аспаптардың бәрі біздің түркі бабаларымыз жасаған дүниелер еді. Міне, осындай құнды мұраларымыздың бәрін еліміз есін жинай бастаған соңғы уақытта жинап, халыққа табыс еткен кісі марқұм Болат Шамғалиұлы Сарыбаев еді».
Кеше елордадағы Президенттік мәдениет орталығында өткен «Болат Сарыбаевтың музыкалық аспаптар коллекциясы» атты көрменің салтанатты тұсаукесер рәсімінде аталған мәдени шаңырақтың директоры Мырзатай Жолдасбеков осылай ой толғады. Айтса айтқандай, көрмеге көрген көздің мейірін қандыратын неше түрлі музыкалық аспаптар қойылыпты. Олардың қатарында қияқпен ойналатын ыспалы аспаптар, шертпелі, үрмелі, ұрмалы және шулы аспаптар бар. Тарихи жәдігерлердің арасында қазақ күйінің қарлығашы Дина Нұрпейісованың қоңыр үнді домбырасының тұруы көрменің салтанатын тіпті арттыра түскен. Бұлардан бөлек, басқа халықтардың да ұлттық аспаптарын, тізбелеп айтар болсақ, Куба барабаны мен сылдырмағы, Сирия, Хакас, Лаос елдерінің, сондай-ақ түркі халықтары мен мажарлардың, үнді халқының кеманча, чиде, қоңырау қатарлы музыкалық аспаптарын тамашалаған көптің тамсана таңдай қақпасына амалы қалмады. Осының бәрі Болат Сарыбаевтың коллекциясында сақталған дүниелер екенін ойласақ, өткеннің өнегесін бүгінгіге бағдар еткен өнер зерттеушісінің қажырлы еңбегіне тәнті болмасқа лажың жоқ. Астана төріндегі бұл көрме 8 маусымға дейін созылады.
Сарыбаев коллекциясындағы сан түрлі аспап
Последние статьи автора