"Шардара" су қоймасы: 22 елдімекенді су басуы қаупі бар
"Шардара" су қоймасы мерзімінен бұрын толып, көктемде апаттық жағдайға әкелуі мүмкін. Сырдария өзенінің жоғарғы ағысының артуы салдарынан "Шардараға" келетін су мөлшері де артқан. Бүгінде су қоймасына тәулігіне орташа есеппен 42 млн текше метр су келуде, - деп хабарлайды Alashainasy.kz тілшісі Іnbusiness.kz-ке сілтеме жасап.
Түркістан облысының әкімі Дархан Сатыбалды бұл мәселе бойынша сараптама жұмыстарын жүргізуді тапсырды.
Мамандардың айтуынша, су қоймасында апаттық жағдай орын алған жағдайда, 34 мың халқы бар 22 елдімекенді су басу қаупі бар.
Сала мамандары су қауіпсіздігін қамтамасыз ету және апаттық жағдайдың алдын алу үшін Үкімет деңгейінде штаб құрылу керек деп есептейді. Осыған қатысты Үкімет пен тиісті ведомствоға хат жолданған көрінеді.
Айта кету керек, "Шардара" су қоймасының пайдалануға берілгеніне жарты ғасырдан асты.
