Павлодарда қате жазылған жарнамаларды түзетуге шыққан мониторинг тобымен жанжал шықты

Мониторинг тобы адамдардың жеке басына тіл тигізуге болмайтынын  естен  шығармауға кеңес береді, деп хабарлайды Pavlodarnews.kz тілшісі

Топ құрамындағы «Jebe» қоғамдық бірлестігінің мүшесі Абзал Қабдраштың айтуынша, тіл жанашырлары сенбі күні мониторингке шығуға шақырған  соң  бірлестіктің атынан арнайы барған.

- «Артур» сауда үйінің алдында жиналып, үш топқа бөліндік. Біздің топта «Тіл майданы» бірлестігінен бір жігіт болды. Тұтынушының міндеттері жайында заңнамаларды шығарып алдық. Әр бутикке кіріп, сатушыларға Тіл туралы заңның 24 және 25-баптар бойынша тұтынушы қай тілде хабарласса, сол тілде жауап беру керек екенін түсіндірдік. Ұлтыңыз өзге ұлт болса да мемлекеттік тіл қазақ тілі екенін ұмытпау керек. Сондықтан саудада қажетті сөздерді жаттап алуға кеңес бердік, – дейді Абзал Қабдраш.

Оның сөзінше, өзге ұлт өкілдерінің көбі ұсынған ақпаратты дұрыс қабылдап,  басқа ұлттан болса да, мемлекеттік тілді үйренуге тырысатындарын және кейбіреулері немерелерін қазақ сыныбына бергенін айтқан.

- Бірақ әр бутикке кірген сайын «Тіл майданының» өкілі дөрекі сөйлеп, дауыс көтеріп, адамдарды дауласуға итермелеп отырды. Сөйтіп жүріп, дегеніне жетті. Өзге ұлт өкілі «Мен қазақ тілін үйренуге қарсы емеспін, үйренемін» деді. Ал, «Тіл майданының» өкілі камерасын қосып, дөрекілік танытып, жеке басына тиетін сөздерді айта бастады. Әрине, бірден жұрт жиналып, дауласа кетті. Мониторингке шыққандағы менің мақсатым - қазақ тілін үйрену керектігін түсіндіру, тілді насихаттау. Дауласу емес! Мониторинг тобынан екенбіз деп, жұрттың бәрімен ұрысып, жеке басына тіл тигізуге болмайтынын ұмытпау керек, - деді Абзал Қабдраш.