Кеңес заманында құпия деп танылған құжаттарға шектеу болмауы тиіс – Берік Әбдіғалиұлы
Саяси қуғын-сүргін құрбандарын толық ақтау жөніндегі мемлекеттік комиссияның өзі мұрағаттарда жұмыс істеу барысында көптеген кедергілерге тап болады.
Бүгін баспасөз мәслихатында Мәжіліс депутаты Берік Әбдіғалиұлы осылай деді. Оның айтуынша, бұл мәселені шешіп, зерттеушілер мен ғалымдарға құжаттарды қолжетімді ету керек. Кеңес заманында құпия деп танылған құжаттарға қатысты тәуелсіз Қазақстанда шектеу болмауға тиіс деді ол.
Берік Әбдіғалиұлы, ҚР Парламенті Мәжілісінің депутаты: – Кейбір құжаттар бүгінгі күні Ресей, Украина және басқа да мемлекеттерде интернетте, кітаптарда шығып жатыр. Ал бізде әлі де болса құпия. Бас прокуратура, Жоғарғы сот, ІІМ, Ұлттық қауіпсіздік комитетімен және мұрағат мамандарымен бірігіп, арнайы комиссия ұйымдастырылып, құжаттарды кезең-кезеңмен құпиясыздандыру керек.
Елде «Қазақстанда ХХ ғасырдың 20-50 жылдардағы жаппай саяси қуғын-сүргін және ақтау процесі: «бірыңғай деректер базасын қалыптастыру» атты ғылыми бағдарлама әзірленді. Бұл туралы премьер-министрдің орынбасары Ералы Тоғжанов мәлімдеді. Оның айтуынша, зерттеушілер мен ғалымдар өз міндетін осы бағдарлама негізінде атқарады.
Айта кетейік, саяси қуғын-сүргін құрбандарын ақтау жөніндегі мемлекеттік комиссияның жұмыс органы болып Білім және ғылым министрлігі бекітілді. Қазір 11 жұмыс тобы құрылып, олардың құрамына 57 ғалым кірді. Асхат Аймағамбетовтың айтуынша, олардың алаңдамай іске кірісуіне барлық жағдай жасалды.
Асхат Аймағамбетов, ҚР білім және ғылым министрі: – Ең бастысы – бұл жұмыс ғылыми негізде, нақты мұрағаттарға сүйене отырып жасалуы керек. Сондықтан ғалымдарымызға тиісті жағдай жасалып, осы жұмыс әрі қарай жүргізіледі. Әрине, ғалымдарымызға тиісті мұрағаттарда жұмыс істеуі үшін рұқсатнама керек болды. Сондықтан бұл жұмысты да атқардық. Қазір ғалымдарымызда барлық мұрағатта қолжетімді болуы үшін рұқсатнама берілді.
