Ғылым күні қарсаңында елордалық бір топ ғалым марапатталды

Бүгін – ғылым күні. Осыған байланысты кеше Білім және ғылым министрі Бақытжан Жұмағұлов бір топ елордалық ғалымдармен кездесіп, мерекелік жиын өткізді.
16 сәуір – ғылым күні деп жарияланғаны белгілі. Алайда ол мереке ретінде әлі қалыптасып үлгерген жоқ. Министр өз сөзін барлық ғалымдарды төл мерекесімен құттықтаудан бастады. «Осы мереке қар­саңында елордамыздағы ең таңдаулы деген ғалымдарды жинап отырмын. Бар­лық ғалымдарды құттықтаймын», – деп атап өтті ол.
Елімізде соңғы жылдары ғылымға деген көзқарас артып келеді. 2009 жылдың қыркүйек айында ғылымды дамытудың жаңа үлгісі жасалғаны белгілі. Сол үлгі аясында биыл «Білім туралы» жаңа Заң қабылданды. Министрдің айтуынша, жаңа заң аясында біраз шаруа атқарылып, үлкен жобалар жасалуда. «Елімізде ғылымға деген көзқарас өзгеше болып отыр. «Қа­зақ­станда ғалымдар жоқ, ғылыми жұ­мыстар да жоқ» деген сөздердің жалған екені дәлелденді. Олар үлкен жаңалықтар ашып жатыр. Ғалымдарға барлық жағ­дайлар жасалуда. Қаржылық және ұйым­дастыру жағынан кедергі жоқ. Бүгінгі таңда біздің ғалымдардың қатысуымен 170 инновациялық жоба әзірленді. Олар­дың 30-дан астамы іске асыруға даяр. Ғылыми-инновациялық байқауға түскен жұмыс­тардың саны 400-ден асты. Бұл біздің ғылыми ортаның инновациялық эконо­микаға бейімделе алғандығын көрсетсе керек», – дейді Білім және ғылым ми­нистрі.
Сондай-ақ ғылыми-зерттеу универ­ситеттері мен институттардың рөлі артып келеді. Осыған орай қазіргі кезде арнайы жұмыстар атқарылып, алдағы уақытта 21 уни­­верситетке инновациялық дәреже бе­ру көзделіп отыр. Ол үшін ғылымдағы бә­се­кені арттырып, саны көп сапасыз оқу орын­дарынан арылу қажет болады. Б. Жұ­ма­ғұлов осы мәселе бойынша жұмыс істеп, жоғары оқу орындарының дайын­дығына қарай Қазақстанда тек 50 университетті ғана қалдыруды жоспарлап отырғанын атап өтті. «Біздің ойымызша, 34 академия және 20-ға жуық институт болмақ», – деді ол.
Мерекелік кездесуде ұзақ жылдар еңбек етіп, білім беру жүйесін дамыту мен өскелең ұрпақты тәрбиелеуге қосқан үлесі үшін Парламент Мәжілісінің депутаты, экономика ғылымының докторы Кенже­ғали Сағадиев және Парламент Сенатының депутаты, профессор ҚР ҰҒА академигі Ғарифолла Есім бастаған бір топ ғалымдар «Қазақстан Республикасының ғылымын дамытуға сіңірген еңбегі үшін» төсбел­гісімен марапатталды. Арнайы төсбелгі­лерді иелеріне министрің өзі табыс етті.